Omnibus Christi fidelibus ad quos praesens scriptum pervenerit r[icardus] divina permissione Sarum ecclesiae minister humilis salutem in Domino aeternam Noverit universitas vestra quod cum prior et conventus de Brommore ordinationi et dispositioni nostrae commississent quicquid juris habuerunt in ecclesia de Eleburne Wake nos cum tam per instrumenta quam per eorum possessionem de ipsorum jure nobis constaret de praedicta ecclesia ordinavimus in hunc modum videlicet quod dicti prior et conventus futuris et perpetuis temporibus percipient nomine beneficii medietatem garbarum de decimis de praedicta parochia provenientibus aliam medietatem praedictarum garbarum cum omnibus aliis decimis percipiente memoratae ecclesiae persona qui pro tempore fuerit ab episcopo Sarum tanquam patrono illius ecclesiae et episcopo in perpetuum promovendus Aream etiam in qua dicti canonici possunt bladum quod in praefata ecclesia percipient collocare eisdem concessimus de terra praedictae ecclesiae ipsis assignandam Concedimus etiam si in hoc commode concordare possint dicti canonici et rector illius ecclesiae quod dictis canonicis assignetur in loco certo certa et limitata portio garbaram nomine medietatis garbarum parochiae praefatae percipienda ut utriusque partis tranquillitati uberius possit provideri Onera etiam moderna ordinaria et extraordinaria inter se pro rata partiantur dicti prior et conventus et rector memoratus Et ut haec ordinatio nostra rata permaneat ad majorem securitatem huic scripto in modum cyrographi confecto cujus una pars penes ecclesiam Sarum altera pars penes monasterium de Brommore remanebit appositum est signum nostrum una cum sigillo capituli Sarum et sigillo praedictorum prioris et conventus de Bromore Actum apud Sarum anno ab Incarnatione Domini m cc xxiiii Kal Maii His testibus domino w[illelmo de Wanda] decano g[alfredo] cantore r[oberto de Hertford] cancellario et aliis

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.