In nomine domini nostri Jesu Christi Amen Nos aegidius Dei patientia Sarum episcopus ad honorem ejusdem Domini et gloriosae virginis Mariae et beati Nicholai pro salute animae nostrae et pro animabus benefactorum nostrorum et omnium eorum pro quibus quocunque titulo vel modo sumus astricti duximus fundare instituere aedificare et construere domum in usum et proprietatem scolarium quae Vallis Scholarium beati Nicholai vocabitur in perpetuum de consensu et assensu domini Roberti decani et capituli Sarum magistri et fratrum hospitalis beati Nicholai Sarum in prato juxta ecclesiam cathedralem Sarum et viam regiam ante dictum hospitale ad perpetuas receptiones receptationem et sustentationem unius custodis pro tempore duorum capellanorum et viginti pauperum egenorum honestorum et docibilium scolarium ibidem Deo et beato Nicholao servientium et inibi amodo viventium in divina pagina et liberalibus artibus studentium et proficientium quem quidem locum cum omnibus pertinentiis suis pro nobis et successoribus nostris dictis custodi et successoribus suis dictis capellanis et scolaribus successoribusque eorum per dictum custodem qui pro tempore fuerit recipiendis damus et concedimus in liberam puram et perpetuam elemosinam in perpetuum duraturam et ipsum locum cum suis ibidem pertinentiis ab omni exactione et censu mundano et ecclesiastico sectis curiarum et hundredorum et sequelis quibuscunque et ab omni seculari servitio et demanda pro nobis et successoribus nostris in perpetuum constituimus immunem liberum et quietum Item habitis [in]super deliberatione et tractatu diligenti statuimus constituimus et statuendo ordinamus quod custos praedictae domus capellanorum et scolarium praedictorum post cessionem vel decessum domini Johannis de Holteby canonici Sarum nunc ejusdem domus custodis de communi nominatione supradicti solius decani et capituli et de gremio ejusdem capituli in posterum assumatur et eorum duntaxat praeficiatur approbatione assensu et voluntate hoc etiam adjecto quod si eum ex causa viderint ammovendum causa in communi inter eos absque judiciaria solemnitate examinata et approbata eundem ammoveant nullo sibi contra hujus ammotionem ex appellationis beneficio remedio competituro Et ut cautius in his prospiciatur statuimus et ordinamus quod idem custos in administrationis susceptione paciscatur et juret se a praedicta ammotionis sententia non appellaturum Item statuimus constituimus et statuendo ordinamus quod idem custos correctionem plenariam habeat tam in temporalibus quam in spiritualibus infra ambitum praedictae domus et ibidem pertinentia salva gravatis ad eundem decanum duntaxat et non ultra appellandi facultate Item statuimus constituimus et ordinamus quod supradicti decanus et capitulum dictae domus sint in perpetuum patroni et ipsius domus patronatum cum pertinentiis habitis et habend eisdem decano et capitulo tenore praesentium damus et confirmamus in perpetuum Et ut supradictae fundatio institutio donationes et concessiones statuta et ordinationes ratae et stabiles maneant in perpetuum tam nos quam praedicti decanus et capitulum magister et fratres supradicti praesentem scripturam ad perpetuam supradictorum memoriam et singulorum approbationem sigillorum nostrorum impressionibus roboravimus et confirmavimus His testibus magistro Radulfo de Hegham cancellario Radulfo de Eboraco Rogero de la Grene archidiacono Wyltes Johanne de Burtone subdecano et domino Roberto Foliot canonicis Sarum dominis Radulfo Russell vicecomite Wyltes et Martino de la Legee militibus Reginaldo de Wych tunc majore Sarum G Chynne W Aubyn Rorando de Herleghe Reginaldo Cersy Willelmo Camerario et aliis

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.