Universis sanctae matris ecclesiae filiis Robertus permissione divina episcopus Sarum salutem in Domino Altissimi nominis ad honorem optantes quod in ecclesia beatae Mariae de Boytone nostrae dioceseos ex nostra sollicitudine cultus divinus perpetuis temporibus augeatur de ea nunc per resignationem magistri Philippi de Stantone proximo ministrantis in ea vacante venerabili patre domino Godefrido Gyffard episcopo Wygornensi domino manerii de Boytone et ecclesiae illius patrono hoc cum devota instantia postulante et ecclesiam ipsam ordinationi et dispositioni nostrae totaliter submittente ordinamus et statuimus quod rector illius qui pro tempore fuerit per nos et successores nostros ad praesentationem dicti domini episcopi et haeredum vel successorum suorum praedicti manerii de Boytone instituendus vitae sit laudabilis et in presbyteratus ordine constitutus curae ejusdem personaliter intendat quodque tres alios dicti ordinis viros idoneos de assensu patroni ecclesiae ipsius eligat et nobis praesentet quos cum admiserimus juxta facultates suas in victualibus exhibeat congruenter eorum cuilibet annuatim duas marcas pro emendis vestibus et aliis necessariis in festis Annunciationis Dominicae et S Michaelis pro aequalibus portionibus impensurus In quibus eligendis et praesentandis si rector et patronus praedicti discordes per unum mensem vel negligentes extiterint alii idonei presbyteri loco deficient[ium] ex tunc per nos et successores nostros canonice praeficiantur ibidem eandem exhibitionem cum stipendiis percepturi Quod si rector taliter institutus in fata decesserit postquam fructus percepit autumnales nihilominus eo anno dictis presbyteris sustentatio congrua cum stipendiis supradictis de fructibus illius integraliter ministretur et de medietate ejus quod residuum decedens ipse testari possit et illius voluntas si inde testatus fuerit debitum sortiatur effectum alioquin de medietate ipsa fiat quod in casu consimili hactenus est obtentum Altera vero medietas successori suo reservetur Et si quacunque parte anni alibi se transferendo gratis cesserit nihil omnino post cessionem hujusmodi percipiat sed totum cedit in usum futuri rectoris pro oneribus praedictis supportandis Omnes siquidem ad sanctae conversationis testimonium sub uno tecto commorantes honeste capis nigris et superpelliciis induti ecclesiam intrent ut Domino laudes simul persolvant secundum usum nostrae ecclesiae cathedralis cum vigiliis et aliis obsequiis mortuorum horas canonicas decantando integraliter et distincte Ad dispositionem siquidem rectoris praedicti ab ipsis quatuor missae quotidie celebrentur una de die alia de beata Virgine cum nota et duae pro episcoporum Sarum Hugonis Gyffard Sibillae quondam uxoris ejus cujus corpus in dicta ecclesia quiescit humatum suae prolis parentumque suorum et omnium in Christo quiescentium animabus nisi infirmitas alicujus eorum vel alia inevitabilis aut rationabilis causa praestiterit impedimentum Ad haec provideat idem rector unum diaconum et alium subdiaconum qui in ecclesia sibi et dictis presbyteris in horis canonicis peragendis et missis celebrandis assistant continue et ministrent Praecipimus etiam quod qui ad rectoriam hujusmodi fuerit admittendus antequam nanciscatur possessionem ipsius ecclesiae praestet corporaliter juramentum quod hanc nostram ordinationem fideliter observabit et perfectius exequetur Dictoque rectori presbyteri memorati faciant simile sacramentum Porro praescriptis rectori et presbyteris praehabito super hoc tractatu cum capitulo nostro et eorum expresso accedente consensu ecclesiam supradictam cum suis pertinentiis perpetuo concedimus juxta ea quae jam diximus obtinendam et auctoritate pontificali plenissime confirmamus Si quis igitur praemissis in aliquo contravenire praesumpserit indignationem Dei omnipotentis incurrat et Virginis gloriosae In quorum testimonium nostri ac nostri capituli ac venerabilis patris domini G Gyffard episcopi Wygorniensis praelibati sigilla praesentibus literis sunt appensa Datum apud Remmesbure xvii kal Januarii anno gratiae m cc lxx nono

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.