Memorandum quod cum domus de vallis Scholarium x kal Augusti anno Domini m cc nonagesimo sexto per mortem magistri Thomae de Brudeport canonico ecclesiae Sarum custodis ejusdem domus vacet nos decanus et capitulum Sarum attendentes custodiam ejusdem domus ad nos tanquam ad superiores ejusdem domus debere absque medio pertinere locum in ipsa domus per mortem magistri Rogeri de Bortone scholaris ejusdem domus vacantem Henrico dicto le Raynyr clerico contulimus jure vacationis intuitu caritatis facientes eundem per discretos viros magistrum Radulfum [de Eboraco] cancellarium et dominum Henricum de Esse concanonicos nostros in praemissi loci cum suis pertinentiis dictis scholaribus quadam simplicitate primo reluctantibus et subsequenter consentientibus possessionem induci juxta dictae domus consuetudinem corporalem Demum volentes dictam domum et ejus statum juxta officii nostri debitum visitare vacatione praedicta durante magistris Waltero de Herevy et Jacobo de Bukyngham clericis nostris injunximus et commisimus vices nostras ut ipsi ad dictam domum accederent personaliter et conjunctim visitationis officium absque magna simplicitate nomine nostro inibi completuri Et ipsi dicto mandato recepto ibidem in forma eis injuncta xvi kal Septembris anno Domini supradicto ad dictam domum personaliter accesserunt de statu dictae domus per scholares ejusdem diligentius inquirendo inter alia injungentes eisdem quod aliquem virum providum et honestum de sociis eorundem cogitarent et eis in crastino nominarent qui administrationem interiorem saltim et etiam exteriorem interim per nos gereret et haberet quousque per nos de alio custode secundum voluntatem fundatoris dictae domus plenius ordinatum fuerit et provisum Quo crastino adveniente dicti magistri Walterus et Jacobus ad dictam domum ut prius personaliter accesserunt et dictis scholaribus congregatis coram eisdem Rogerum dictum Fuke conscholarium eorundem ad dictam administrationem faciendam concorditer [nominaverunt] quem dicti clerici nostri ut eis per nos injunctum extitit vice nostra in dictum officium praefecerunt Demum dictus Henricus Reynyr juramentum fidelitatis ad quod quilibet scholaris in suo ingressu secundum dictae domus consuetudinem obligatur obtulit et praestitit subsequenter coram dictis scholaribus et nostris clericis antedictis Acta et relata nobis die Veneris proxima post festum Assumptionis beatae Virginis cum continuatione et prorogatione diei sequentis proximae post dictum festum beatae Virginis anno Domini supradicto

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.