Omnibus Christi fidelibus ad quos presens scriptum pervenerit de Sancto Albano et de Dunestapl[] Priores et Archideaconus de Sancto Albano Lincoln[] diocesis Judices a domino Papa delegati salutem in eo qui salus est omnium Ad noticiam universitatis vestre volumus pervenire quod cum Prior et fratres hospitalis Jerusalem in Anglia abbatem et conventum de Haghmon[] super decimis capelle de Knokin tam maioribus quam minoribus spectandis ad matricem ecclesiam hospitalis Jerusalem in Anglia que vocatur Kinardley coram nobis auctoritate litterarum domini Pape que post salutacionem sic incipiunt Quia nimis dispendiosum etc traxissent in camera lis tandem inter dictos Priorem et fratres per fratrem Thomam Magistrum eo tempore hospitalis Jerusalem Norwallie et Suthwallie nomine eorum componentem et habentem super hoc specialem potestatem ex una parte et Abbatem et Conventum ex altera prout in eorum litteris huic inde super hoc confectis vidimus contineri conquievit hoc fine videlicet quod instrumenta que optinuerunt dicti abbas et conventus super ecclesiam de Kinardley pro bona pacis dictis Priori et fratribus remiserunt et fratri Thome Magistro Hospitalis Jerusalem Norwallie et Suthwallie tradiderunt Remiserunt eciam eisdem decimas tocius terre de Osberneston et totum principale legatum de omnibus parochianis de villa de Knokin Concesserunt eciam quod parochiani de Knokin singulis annis die Beate Brigide virginis matricem ecclesiam de Kynardeley cum suis visitent oblacionibus Dicti vero Prior et fratres predictam capellam de Knokin cum suis pertinentiis exceptis prenotatis videlicet principali legato decimis tocius terre de Osberneston et oblacionibus parochianorum de Knokin in die Sancte Brigide cum visitabunt matricem ecclesiam suam de Kinardeley una cum duodecim denariis quos annuatim nomine ecclesie sue de Kinardeley percipere consueverunt dictis abbati et conventui et ecclesie sue imperpetuum remiserunt et liti penitus renunciaverunt Nos autem ne super premissis possit ulterius oriri contencio prout inter litigatores prefatos convenit unum alii auctoritate apostolica qua fungimur sentencialiter condempnamus et adiudicamus utrique eaque sibi utrumque ex dicte composicionis forma habere placuit et in hiis in quibus se mutuo absolverunt predicta auctoritate eos mutuo absolventes Et in huius rei robor et testimonium presenti scripto ad peticionem procuratorum partium videlicet Magistri Johannis de Rua procuratoris hospitaloriorum generalis et habentis in omnibus eorum causis transigendi componendi potestatem et fratris Alexandri canonici de Haghmon[] procuratoris pro abbate et conventu et ab eis missi specialiter ad componendum sigilla nostra apposuimus anno domini millesimo ccxlviii Kaland[] Junii etc

Source Fulltext: The Cartulary of Haughmond Abbey. Una Rees. Shropshire Archaeological Society and Univ. of Wales Press. Univ. of Wales Press. Cardiff. 1985.