Antonius permissione divina sancte jerosolimitan[] ecclesie patriarcha et episcopus Dunelm[] dilectis in Christo filiis priori et conventui ecclesie de Lanrecost Karliolensis dyocesis salutem graciam et benedictionem Licet ex officii pastoralis debito ac paterne compassionis affectu subditorum oppressionibus succurrere teneamur pro veris tamen incommodis amovendis eo cogitare propensius astringimur quo vos in vinea Domini per regulares observancias Deo placabiles hospitalitatem honorabilem et alia multiplicia caritatis opera novimus vigilancius laborare Sane ad lamentabilem statum ecclesie vestre de Lanrecost[] predicte per repentini incendii voraginem iam consumpte nec non ad alia loca vestra nonnulla per sevientem Scotorum incursum depredationes innumeras et hostiles invasiones eorundem multiplices in favillam et cineres proch dolor iam redacta aliis bonis vestris sic consumptis que ad sustentationem vestram et onera incumbentia facultates quas in presenti habetis sufficere non poterunt ut decet oculos nostros compassionabiliter dirigentes intimeque pensantes quod ob cotidianum adventum regalis exercitus per vos ac frequentem aliorum supervenientium concursum onerosum vestra hospitalitas que ad premissa minus sufficit plus solito aggravatur inducimur obnixius et hortamur ut in tanta necessitate ob sustentationem vestram per bonorum temporalium incrementum vobis et ecclesie vestre iam dicte quatenus possumus congrue succuramus Habito igitur super hiis tractatu sollempni et diligenti qui in talibus requiritur invocato Christi nomine ecclesiam de Midford[] parochialem et curatam nostre dyocesis Dunelm[] cuius estis advocati et patroni prout apparet per cartam clare memorie domini Edwardi nuper regis Anglie vobis inde confectam cuius etiam ecclesie vir discretus magister Robertus de Leyschech rector existit in presenti cum suis juribus et pertinenciis universis in usus vestros proprios perpetuo habend tenend et possidendam vestre ecclesie ac domui predicte vobisque ac successoribus vestris ob causas predictas autoritate pontificali conferimus concedimus donamus et appropriamus per presentes volentes et concedentes ut cedente vel decedente magistro Roberto nunc rectore dicte ecclesie supradicto proprietatem et possessionem eiusdem ecclesie de Midford autoritate vestra libere ingredi et in usus vestros proprios integraliter retinere valeatis consensu nostro vel successorum nostrorum aut aliorum quorumcunque cuiuscunque sint conditionis vel status minime requisito Salva in omnibus vicaria dicte ecclesie ac sustentatione competenti vicarii eiusdem qui pro tempore fuerit de fructibus eiusdem ecclesie et proventibus per nos aut successores nostros facienda et ordinanda Cuius quidem vicarie ordinationem ipsiusque provisionem ac collationem quandocunque ipsam vacare contigerit nobis et successoribus nostris de vestro expresso consensu specialiter reservamus jure et autoritate tam nostra dyocesana quam alia ordinaria quacunque per omnia semper salvis In cuius rei testimonium has literas nostras vobis fieri fecimus patentes sigilli nostri patriarchalis cum nostro sigillo episcopali indorsato munimine roboratas Datas apud Midelham nono die mensis Septembris anno Domini m cc vii patriarchatus anno secundo et consecrationis nostre vicesimo quarto

Source Fulltext: Lanercost Cartulary. J. M.Todd. Cumberland and Westmorland Antiquarian and Archaeological Society Record Series, V.11. Surtees Society. Athenaeum Press. Durham. 1997.