Hec est finalis concordia facta in curia domini regis apud Lancastriam in crastino sancti Martini anno regni regis Henrici filii regis Johannis vicesimo sexto [...] inter johannem abbatem de fontibus querentem per fratrem Robertum monachum suum positum loco suo ad lucrandum vel perdendum et Willelmum de Percy per Richemannum Calle positum loco suo ad lucrandum vel perdendum de hoc quod idem Willelmus deforciat ei pasturam suam in Longestrod contra cartam antecessorum suorum et suam quas idem abbas inde habet quas quidem cartas idem Willelmus coram justiciariis itinerantibus apud Eboracum cognovit et eidem abbati warantizavit et unde idem abbas questus fuit quod desicut ipse coram prefatis justiciariis apud Eboracum recuperavit seisinam suam in eadem pastura versus eundem Willelmum et idem Willelmus levavit logias et sepes in predicta pastura et inclusit circiter octies viginti acras bone pasture quominus ad predictam pasturam venire potest Et unde placitum fuit inter eos in eadem curia scilicet quod predictus Willelmus concessit pro se et heredibus suis quod predictus abbas et successores sui habeant pasturam ad quater viginti matrices equas cum sequela sua trium annorum et octo stalones per totum in Longestrod[] preter infra clausa circa logias ipsius Willelmi facta scilicet de Crei Huberam Yoghannesthweit Risegil Depedale Bekeresmotes et Uhtredescal ita tamen quod si equi predicti cum eorum sequela infra predicta clausa forte ingrediantur non inparcabuntur per predictum Willelmum vel heredes suos vel ballivos eorum set rechaciabuntur sine detrimento predictorum equorum Bene eciam licebit predicto abbati et successoribus suis habere equiciarios suos proprios in predicta foresta et quamdam logiam ad opus ipsorum et facere faldas ubicunque voluerint de bosco ipsius Willelmi vel heredum suorum vel de petra si voluerint et preter hoc facere ignem de eodem bosco ad signandum equos suos absque impedimento predicti Willelmi vel heredum suorum Et idem Willelmus et heredes sui facient forestarios equiciarios et vaccarios suos jurare quod non terrebunt maliciose nec effugabunt equos predictos per cornua vel per clamores vel per aliquod machinamentum terroris quo cicius de predicta pastura amoveantur vel terreantur vel quominus libere et plenarie utantur pastura sua ubique sicut predictum est Et si aliquis forestariorum equiciariorum vel vaccariorum predictorum contra hoc transgressus fuerit et super hoc convictus predictus Willelmus et heredes sui transgressionem illam secundum quantitatem delicti predicto abbati et successoribus suis racionabiliter emendari facient Preterea idem Willelmus concessit pro se et heredibus suis quod predictus abbas et successores sui habeant tres vaccas cum sequela sua unius anni in comuni pastura de Bukedene imperpetuum Et si forte predicte vacce cum earum sequela infra predictam forestam de Longestrod intraverint non inparcabuntur per predictum Willelmum vel heredes suos vel eorum ballivos set rechaciabuntur sine detrimento earum Preterea concessit pro se et heredibus suis quod equiciarii predicti ipsius abbatis et successorum suorum possint capere sufficienter estoverium suum ad ardendum in communi bosco de Bukedene imperpetuum Et pro hac concessione fine et concordia idem abbas concessit pro se et successoribus suis quod predictus Willelmus et heredes sui habeant libere et quiete quoddam clausum quod de consensu predicti Willelmi et predicti abbatis factum fuit super Creibek salva eidem abbati et successoribus suis pastura sua infra predictum clausum ad equos suos predictos imperpetuum Et quod habeant omnes logias suas que facte fuerunt die quo hec concordia facta fuit in predicta foresta Et quod liceat eis predicta clausa circa predictas logias claudere fossato et haya pro voluntate sua absque impedimento vel contradiccione predicti abbatis vel successorum suorum Nec licebit predicto Willelmo vel heredibus suis plures logias vel plura clausa in predicta foresta facere quam facta fuerant die qua hec concordia facta fuit vel predicta clausa ampliora facere nisi de consensu predicti abbatis vel successorum suorum Preterea idem abbas concessit pro se et successoribus suis quod predictus Willelmus et heredes sui possint infra predictam forestam falcare ubicunque voluerint dum tamen loca in quibus falcatur in defenso non ponantur per predictum Willelmum vel heredes suos vel per ballivos eorum quominus predictus abbas vel successores sui habeant pasturam in predictis locis ante tempus falcacionis et post pro voluntate eorum Et sciendum quod predictus abbas et successores sui facient equiciarios et vaccarios suos jurare quod maliciose non terrebunt nec effugabunt averia predicti Willelmi vel heredum suorum per cornua vel per clamores vel per aliquod machinamentum terroris quo cicius de predicta pastura amoveantur vel terreantur vel quominus utantur pastura sua ubicunque voluerint Et si aliquis equiciariorum vel vaccariorum predictorum in aliquo fuerit transgressus et super hoc convictus predictus abbas et successores sui transgressionem illam secundum quantitatem delicti predicto Willelmo et heredibus suis racionabiliter emendari facient sicut superius dictum est

Source Fulltext: Percy Cartulary. M. T. Martin. Surtees Society, V.117. Surtees Society. Andrews & Co. Durham. 1911.