[u]niversis sancte matris ecclesie filiis ad quos presens scriptum pervenerit Walterus dei gratia Eboracensis archiepiscopus Anglie primas et magister Robertus precentor Walterus archidiaconus de Estriding Johannes subdecanus Willelmus de Suwel canonici Eboracenses salutem in domino Cum contentio mota esset inter Stephanum priorem et conventum de Pontefracto ex una parte et Gaufridum decanum et capitulum Eboracense ex altera super ecclesiam de Ledeshama et aliquandiu agitata tandemque utraque pars dictam ecclesiam de Ledeshama cum omnibus suis pertinentiis nostre ordinationi pure et absolute commisit Nos autem habita deliberatione et consideratis circumstantiis de predicta ecclesia de Ledeshama ad perpetuam utriusque partis pacem sic ordinavimus Inprimis statuentes quod perpetuus vicarius sit in ecclesia de Ledeshama presentandus per priorem et conventum de Pontefracto post decessum illius qui hac vice in eadem per dominum archiepiscopum instituetur Qui quidem vicarius habebit nomine vicarie totum altaragium cum tota terra et prato pertinentibus tam ad ecclesiam predictam quam ad ejusdem capellas cum decimis fenorum et molendinorum totius parochie exceptis decimis feni de Castelford Et dictus vicarius omnia honera debita et consueta tam ecclesie quam capelle de Fareburna sustinebit Capellam vero de Fareburna cum omnibus pertinentiis suis excepta portione vicario ecclesie de Ledeshama perpetuo assignata commune Eboracensi ecclesie assignavimus Ecclesiam vero de Ledeshama cum omnibus pertinentiis suis excepta capella de Fareburna cum suis pertinentiis que commune Eboracensi est assignata et excepta portione quam vicario perpetuo assignavimus priori et conventui de Pontefracto duximus assignandam Nos vero in predictorum testimonium presenti scripto sigilla nostra duximus apponenda Actum apud Eboracum die martis proxima ante festum sancti Nicholai anno gratie m cc tricesimo quinto

Source Fulltext: Chartulary of St. John of Pontefract. Richard Holmes. Yorkshire Archaeological Society, V.25. Yorkshire Archaeological Society. Leeds. 1899.