Edwardus Dei gratia rex Anglie etc omnibus ad quos etc salutem Licet de communi consilio regni nostri Anglie statuerimus quod non liceat viris religiosis seu aliis ingredi feodum alicuius ita quod ad manum mortuam deveniat sine licencia nostra et capitalis domini de quo res illa inmediate tenetur Volentes tamen per finem quem dilectus nobis in Christo magister milicie Templi in Anglia fecit nobiscum coram venerabili patre W[altero] Coventren[si] et Lich[feldensi] episcopo thesaurario nostro concessimus et licenciam dedimus pro nobis et heredibus nostris quantum in nobis est Roberto de Whitheme clerico quod ipse quatuor viginti et octo acras terre cum pertinentiis in magna Sutton[] dare possit et assignare predicto magistro et fratribus milicie Templi predicti habendas et tenendas sibi et successoribus suis de capitalibus dominis feodi illius per servicia inde debita et consueta imperpetuum et eisdem magistro et fratribus quod ipsi terram predictam cum pertinentiis suis a prefato Roberto recipere possint et tenere sicut predictum est tenore presencium similiter licenciam dedimus specialem nolentes quod idem magister et fratres seu eorum successores aut predictus Robertus vel heredes sui per nos vel heredes nostros iusticiarios escaetores vicecomites aut alios ballivos seu ministros nostros quoscumque inde occasionentur molestentur in aliquo seu graventur In cuius rei testimonium etc Teste rege apud Westmonasterium vicesimo octo die marcii Patentes regis Edwardi filii regis Henrici anno tricesimo tercio

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 23. British Academy. Oxford University Press. Oxford. 1996.