Sciant tam presentes quam futuri quod ego Hasculphus le Bret pro Deo et salute anime mee et animarum omnium antecessorum et successorum meorum dedi et concessi remisi et quietum clamavi in puram et perpetuam elemosinam Deo et beate Marie et sancto Iohanni Baptiste et beatis pauperibus sancte domus hospitalis Ierusalem duos solidatas redditus scilicet de illis viginti [et octo denariis quos] ipsi michi annuatim reddere solebant de viginti acris terre cum pertinentiis in Wenintone quas [pater meus] et ego postea eis dederamus in elemosinam ita quod ubi ipsi michi prius reddere consueverunt viginti et octo denarios per annum de predictis viginti acris terre cum pertinentiis ad duos terminos de cetero reddant michi et heredibus meis quatuor denarios per annum ad duos terminos scilicet ad Pascha duos denarios et ad festum sancti Michaelis duos denarios pro omni servicio salvo forinseco servicio quantum ad tantam terram pertinet Hanc autem puram elemosinam meam et terram predictam eis et eorum successoribus tenendam per predictum servicium quatuor denariorum per annum pro omni servicio salvo forinseco servicio Ego et heredes mei ipsis et eorum successoribus imperpetuum warantizabimus acquietabimus et defendemus versus omnes gentes tanquam liberam elemosinam nostram Et ne ego vel aliquis heredum meorum post me hanc meam donacionem infirmare vel contra hanc meam remissionem et quietam clamanciam venire possimus presentem cartam sigillo meo signatam eis feci in testimonium Hiis testibus Gilberto de Marisco Hugone Brytone Gerardo de Gerpenvill[] Sawino de Wenintone Radulpho de Wadefliete Iohanne de Reynham clerico et multis aliis

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 23. British Academy. Oxford University Press. Oxford. 1996.