Hec indentura testatur quod cum Henricus Darcy teneat et tenere debeat de priore hospitalis sancti Iohannis Ierusalem in Anglia illa terras et tenementa que quondam fuerunt Roberti Bayous in Westthurroke que quondam tenebantur de magistro et fratribus milicie Templi per certa servicia de quantitate quorum serviciorum controversia mota fuit inter dictos priorem et Henricum tamen pro bono pacis concordatum est inter partes predictas quod predictus Henricus tota vita sua teneat dicta terras et tenementa de dicto priore et successoribus suis per servicia viginti septem solidorum et septem denariorum per annum et secte ad curiam dicti prioris de Pourteflete pro omnibus serviciis omnibus arreragiis antea remissis ita quod heredes et assignati ipsius Henrici dicta terras et tenementa teneant de predicto priore et successoribus suis per servicia de iure antiquitus debita si que fuerint alia quam servicia predicta salvis semper dicto Henrico et assignatis ipsius Henrici defensionibus suis Concedit eciam dictus Henricus quod nullum placitum inde placitatum nec solucio quantitatis redditus predicti post mortem predicti Henrici cedat in preiudicium dicti prioris vel successorum suorum si plus de iure debeatur Concedit eciam idem Henricus quod in brevi inde inter eos pendente idem Henricus in octabam sancte Trinitatis proximam futuram erit non prosecutus In cuius rei testimonium partes predicte presentibus indenturis sigilla sua alternatim apposuerint Data apud Clerkenwelle iuxta London[ium] die quintadecima mensis maii anno regni regis Edwardi tercii a conquestu Anglie tricesimo secundo.

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 23. British Academy. Oxford University Press. Oxford. 1996.