Omnibus sancte matris ecclesie filiis ad quos presens scriptum pervenerit Beatrix quondam uxor Walteri David de Hernestede salutem Noverit universitas vestra me in ligia viduitate mea et potestate concessisse dedisse remisisse et hac presenti carta mea imperpetuum quietum clamasse Deo et beate Marie et beato Iohanni Baptiste et priori et fratribus hospitalis Ierusalem in Anglia totum ius et clameum quod habui vel aliquo modo habere potero nomine dotis sive aliquo alio modo in omnibus terris quas dictus Walterus quondam tenuit in villa de Bumstede Helyun et in villa de Hamstede de quibus quidem terris dicti prior et fratres sunt in plenaria seisina ita quod nec ego dicta Beatrix sive aliquis pro me vel per me nullum ius vel clameum de predictis terris vel de aliquibus aliis quas ipsi fratres in predictis villis tenent de cetero possimus habere exigere clamare vel vendicare Pro hac autem concessione donacione remissione et presentis carte mee quieta clamacione dederunt michi dicti prior et fratres et propagarunt duodecim solidos sterlingorum Hec nostra quieta clamacio facta fuit apud Bumstede Helyun die sancti Lucie virginis anno regni regis Henrici filii regis Iohannis tricesimo nono In cuius rei testimonium presenti carte sigillum meum apposui Testibus domino Andrea de Helyun milite Willelmo de Belemumbre Rogero camerario Launcelino filio Radulphi Galfrido de Holmestede Gilberto filio Mathei Willelmo del Hoo Henrico Auvre et aliis

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 6. British Academy. Oxford University Press. Oxford. 1982.