Uniuersis sancte matris ecclesie filiis ad quos presentes litere peruenerint Simon prior sancte Frideswide Oxonie et eiusdem loci totus conuentus salutem in uero salutari Nouerit uniuersitas uestra nos intuitu fraternitatis et mutue confederacionis de consilio uirorum bonorum et zelum religionis habencium unanimi consensu et spontanea uoluntate gratis et liberaliter in perpetuum remisisse fratribus nostris et concanonicis abbati et conuentui de Oseneia querelas omnes quas aliquando coram iudicibus a domino papa Innocencio tercio delegatis W uidelicet abbate de Thama Rogero priore de Abbendona et magistro Thoma de Watelei eis mouimus super ecclesia beate Marie Magdalene extra portam aquilonarem Oxonie sita et decimis de Northam et de crofta trium bergarum quam Nigellus decanus tenuit promittentes in uerbo ueritatis quod nunquam ipsis super possessione uel proprietate predicte ecclesie uel decimarum predictarum aliquam controuersiam mouebimus Et ne in posterum nobis uel successoribus nostris detur aliqua occasio contra hanc concessionem et remissionem ueniendi omni iure eorum quod in eisdem possessionibus se habere scilicet in ecclesia et decimis asserebant eis saluo et in sua firmitate permanente nos quicquid iuris in prefata ecclesia et decimis per cartas uel donaciones uel alio quocumque modo nos habere dicebamus renunciacione coram predictis iudicibus facta eis concessimus et in perpetuum remisimus Omnia uero instrumenta que super prefata ecclesia et decimis habuimus ipsis in iure per manus predictorum iudicum resignauimus Usui etiam aliorum instrumentorum si qua forte in posterum ex parte nostra reperta fuerint penitus renunciauimus Nos autem tempore huius concessionis et remissionis omnem querelam super predicta ecclesia et decimis et circa easdem res tam super fructibus quam super expensis et aliis que in huiusmodi causis exigi solent ne de cetero moueatur gratis et amicabiliter adinuicem remisimus Adiecimus etiam promittentes in uerbo ueritatis quod nunquam sepedictam ecclesiam uel aliquid in eadem ecclesia siue possessionem siue proprietatem siue aliquid aliud neque in predictis decimis sine spontanea uoluntate eorum a quocunque uel per quemcunque recipiemus Nichil etiam in preiudicium et detrimentum prefate concessionis et remissionis per artem uel ingenium aliquo modo machinabimur Ut autem predicta concessio et remissio perpetuam optineant firmitatem presenti scripto cum sigillorum nostrorum apposicione eandem concessionem et remissionem confirmauimus Hiis testibus Radulfo priore de Niweham magistro Simone de Gloecestria magistro Nicholao de Westmonasterio magistro Iohanne de Ikeford magistro Thoma de Helam magistro Nicholao de Hamtone magistro Roberto de Clipstone magistro Ricardo de Tirintone magistro Reg[inaldo] de Bracch[ele] Saerio clerico Iohanne clerico de sancto Georgio Iohanne Bretello

Source Fulltext: Cartulary of Oseney Abbey. H. E. Salter. Oxford Historical Society, V.90. Oxford Historical Society. Clarendon Press. Oxford. 1929.