Anno domini mcc octogesimo secundo in uigilia Omnium Sanctorum facta est hec conuentio inter abbatem Oseneye et conuentum de Oseneya ex parte una et priorem et fratres de monte Carmeli ex altera de assensu ordinarii uidelicet quod dicti abbas et conuentus concesserunt et quiete clamauerunt pro se et suis successoribus dictis priori et fratribus et eorum successoribus quod quiete et pacifice possint tenere edificare et in perpetuum quantum ad eos attinet possidere aream illam quam Ricardus dictus Maydeloc aliquando inhabitauit ubi porta eorundem est erecta continentem sexaginta pedes in longitudine et triginta in latitudine que iacet inter terram que fuit Willelmi de Eynesham ex una parte et terram que fuit Ricardi le Kam ex altera in suburbio Oxonie in parochia sancti Georgii in castro Oxonie iuxta le huthe liberam et quietam imperpetuum ab omni exactione decimarum oblationum et prouentuum quorumcumque ad dictam ecclesiam beati Georgii pertinentium quocumque nomine censeantur quam dicti abbas et conuentus habent appropriatam Et quia ex dicti iuris remissione seu concessione ac quieta clamatione ecclesia eorundem abbatis et conuentus lederetur nisi aliquam assequerentur benefitii recompensationem canonicam in premissis ideo prefati fratres sexdecim solidos argenti eisdem gratis contulerunt pre manibus ad annuum redditum pro indempnitate eorundem comparandum necnon pro eorum tranquillitate perpetuo duratura Et ut hec conuentio concessio et quieta clamatio rata et stabilis permaneat imperpetuum huic scripto ad modum cirographi confecto partes altrinsecus sigilla sua apposuerit Dat apud Oseneyam anno et die supradictis

Source Fulltext: Cartulary of Oseney Abbey. H. E. Salter. Oxford Historical Society, V.90. Oxford Historical Society. Clarendon Press. Oxford. 1929.