Memorandum quod cum parochiani de villa Froucestre essent peremptorie vocati quod comparerent coram nobis officiario Wygorniae in ecclesia Sancti Nicholai Gloucestriae in crastino Sancti Michaelis anno regni regis Edwardi decimo responsuri quare capellam Froucestre non reparabant et cooperiebant Ideo parochiani coram nobis in judicio constituti in praesentia vicarii ejusdem loci allegabant quod prius conventum erat inter dictum vicarium et ipsos quod idem vicarius haberet tertiam partem legatorum ecclesiae dictae villae de Froucestre et idem vicarius dictam capellam reficeret quam conventionem idem vicarius fatebatur expresse et se ex hujusmodi conventione ad reficiendam et cooperiendam dictam capellam teneri Unde nos ejusdem vicarii conventionem secuti dictum vicarium ad reficiendam et cooperiendam dictam capellam in hiis scriptis condemnamus et praefatis parochianis ad solvendum eidem vicario tertiam partem legatorum ut praedictum est similiter condemnamus Datum die et loco praedictis anno Domini millesimo ducentesimo octogesimo secundo

Source Fulltext: Historia et Cartularium Monasterii Sancti Petri Gloucestriae. William Henry Hart. Rerum Britannicarum Medii Aevi Scriptores, 33 P.1. Longman, Green. Longman, Roberts and Green. London. 1863.