Uniuersis sancte matris ecclesie filiis Philippus prior sancte Frideswide et magister Ricardus de Eilesberia salutem in domino Cum causa que uertebatur inter abbatem et monachos de Egnesham et Gillebertum Basset et magistrum Gillebertum et Walterium clericos de Bernecestria super duabus garbis decimarum de dominio de Strattona auctoritate uenerabilis patris nostri Hugonis Lincolniensis episcopi nobis esset commissa tandem partibus coram nobis constitutis hoc fine conquieuit Siquidem ecclesia de Bernecestria prefatas duas garbas decimarum de dominio de Strattona in perpetuum habebit libere et quiete quas prefati monachi ad se pertinere proponebant et xii solidos infra xv dies post festum sancti Michaelis ecclesie de Egnesham annuatim nomine pensionis persoluet ita quod si prefata ecclesia de Bernecestria infra terminum prenominatum predictam pensionem xii solidorum non reddiderit ecclesia de Egnesham ad prescriptas duas garbas decimarum de quibus controuersia fuerat liberum habebit regressum Et ne que semel amicabili compositione terminata sunt alicuius in posterum temeritate in irritum deuocari ualeant prefatam compositionem inter prenominatas ecclesias factam sigillorum nostrorum appositione roborare curauimus His testibus Nigello decano de Oxenefordia Ernaldo Radulfo Hugone presbiteris Walterio presbitero magistro Iohanne de Tinemue magistro Roberto de Eboraco Roberto filio Petri de Lamara Willelmo fratre suo Hugone de Druual Roberto de Amari Henrico Banastre

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.