Notum sit omnibus Christi fidelibus ad quos presens scriptum peruenerit quod cum orta esset contencio inter magistrum Serlonem canonicum ecclesie Lincolniensis rectorem ecclesie de Bannebiria ex una parte et abbatem et conuentum de Egnesham ex altera coram thesaurario sancti Pauli London[ie] et archidiacono Colecestrie auctoritate apostolica cognoscentibus super omnibus decimis tam maioribus quam minoribus quas dicti abbas et conuentus ab antiquo perceperunt in parochia ecclesie de Bannebiria tandem lis inter eos mota sub hac forma amicabiliter conquieuit uidelicet quod prenominati abbas et conuentus percipient libere et absque omni contradictione omnes decimas maiores garbarum scilicet in campis de Bannebiria de Wykham et de Herdwike quas prius percipere consueuerunt in eadem parochia exceptis decimis prouenientibus de octo acris terre dicte ecclesie quas dictus rector tempore istius compositionis propriis sumptibus excolebat et exceptis decimis prouenientibus de uestura unius acre terre quam uesturam idem rector in dicta parochia percipit annuatim de dominico Radulfi tunc domini de Wikham Has uero decimas nouem acrarum dictarum memoratus rector percipiet Percipiet autem integre et sine omni impedimento omnes minutas decimas quas prefati abbas et conuentus in eadem parochia percipere consueuerunt excepta decima lane proueniente de domo domini episcopi in parochia sepedicta quam idem abbas et conuentus in eadem parochia percipere consueuerunt et de cetero percipient Ut autem hec compositio sit realis perpetuam optinens firmitatem utraque pars pro se et successoribus suis inpetratis et inpetrandis renunciauit imperpetuum et huic scripto in modum cyrographi confecto hinc inde sigillum suum apposuit una cum sigillo uenerabilis patris Roberti tunc Lincolniensis episcopi in cuius presencia inita est hec compositio cui etiam idem episcopus suum prebuit assensum Act[a] apud Bannebiriam anno gracie m cc tricessimo octauo Idus Decembris

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.