Omnibus Christi fidelibus ad quos presens scriptum peruenerit Radulfus de Saucey salutem in domino Noueritis me recepisse decem et octo marcas a monachis Egneshamie anno gracie m cc xli die sancte Fidis pro uno prato in Estcote quod uocatur Sauceysham pro qua pecunia obligaui me et heredes meos dictis monachis fide media quod si fuerint inpediti de saysina dicti prati uel per aliquem Christianum uel Iudeum inplacitati uel deteriorati ego uel heredes mei infra octo dies proximo sequentes faciemus eis warentizacionem uel excambium de alio prato uel de terris uel redditibus meis ad ualenciam prati prenominati Quod si factum non fuerit ego uel heredes mei reddemus eis dictas decem et octo marcas infra dictos octo dies cum dampnis et expensis eorum ob hoc factis sub pena decem marcarum Et ad hoc faciendum obligaui me et heredes meos sacramento interposito renunciando omni appellacioni excepcioni regie prohibicioni et omni inpetracioni in contrarium facte uel faciende In cuius rei testimonium huic presenti scripto sigillum meum apposui

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.