Uniuersis Christi fidelibus presens scriptum uisuris uel audituris Alexander permissione diuina abbas Egneshamie et eiusdem loci conuentus salutem eternam in domino Nouerit uniuersitas uestra quod nos caritatis intuitu unanimi assensu dedimus et concessimus dilecto nobis in Christo magistro Bartholomeo de Newenthone clerico nostro nomine pensionis x marcas argenti de ecclesia sancte Eldrede de Hystona Elyensis diocesis que ad nostram cum uacauerit spectat donacionem singulis annis sine more dispendio in festo Omnium Sanctorum percipiendas uel suo certo procuratori Et bona fide promittimus et tenore presencium nosmet ipsos obligamus quod eodem b[artholomeo] clerico superstite cedente uel decedente magistro R rectore eiusdem ecclesie predicto seu alio modo canonico prefatam ecclesiam uacare contigerit nullum alium ad dictam ecclesiam presentabimus Quod ut perpetuum et firmum robur optineat presentibus litteris in capitulo nostro communiter et unanimiter sigilla nostra apposuimus Date Egneshamie anno gracie m cc lx sexto die Mercurii proxima ante festum sancti Georgii Martiris

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.