Uniuersis presentes litteras inspecturis I diuina miseracione abbas Egneshamie totusque eiusdem loci conuentus ordinis sancti Benedicti Lincolniensis diocesis salutem in domino Nouerit uniuersitas uestra quod nos unanimi assensu et libera uoluntate pro diuine pietatis intuitu et contemplacione uenerabilis patris domini O sancti Adriani diaconi cardinalis apostolice sedis legati qui super hoc nos rogauit nomine pure elemosine promisimus dare et soluere magistro Alfonso de Senis Oxon[] studenti centum solidos sterlingorum singulis annis usque ad triennium proximo futurum pro sua sustentacione in studio supradicto quos centum solidos nos persoluemus eidem Oxonie apud sanctam Fredeswidam in terminis infrascriptis uidelicet infra quindenam sancti Iohannis Baptiste proximo uenturi l solidos et infra quindenam Nathalis Domini proximo uenturi alios quinquaginta solidos et sic de proximis aliis festiuitatibus sancti Iohannis Baptiste et Natalis Domini continue sequentibus quousque per nos in dictis tribus proximis annis continue sequentibus fuerit eidem de predictis centum solidis annuis integre satisfactum In cuius rei testimonium presentibus litteris sigilla nostra fecimus apponi Actum apud Egnesham in capitulo nostro die sancte Trinitatis anno domini m cc lxviii

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.