Uniuersis presentes litteras inspecturis prior de Egnesham procurator abbatis et conuentus loci eiusdem salutem in auctore salutis Uniuersitati uestre tenore presencium notum fiat quod ego secundum ordinacionem uenerabilis patris H dei gracia Eliensis episcopi nomine abbatis et conuentus predictorum promisi et teneor in manso assignato ad opus uicarii ecclesie sancte Etheldrede de Hystone per eundem episcopum de meo consensu construere domos subscriptas sumptibus dictorum abbatis et conuentus de lignis de quercu uidelicet unam aulam longitudinis uiginti sex pedum ad minus et latitudinis uiginti duorum pedum et ex una parte unam dispensam et ex altera parte unam cameram competentem cum necessariis camere item unam coquinam in loco competenti cum pistrino et bracino ita tamen quod erunt sub eodem tecto In cuius rei testimonium presentibus sigillum meum appendi Et sciendum est quod domus nostre ibidem sunt sequestrate donec domus uicarii sint perfecte Datum apud Hystone in festo Exaltacionis sancte Crucis anno domini m cc lx octauo

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.