Per presens scriptum pateat uniuersis quod cum frater Iohannes de Oxonia dudum abbas monasterii de Egnesham suam fecisset spontaneam cessionem ac nos Oliuerus permissione diuina Lincolniensis episcopus suo successori abbati et eiusdem loci conuentui nostris litteris mandassemus quod pensatis pensandis circa prouisionem dicto Iohanni faciendam tam inter se quam cum eodem de eadem tractarent ac nos super eorum tractatu redderent certiores tandem predicti abbas et conuentus de prouisione memorata tractantes cum in certam formam conuenire minime potuissent super eadem facienda nostre se ordinacioni absolute et totaliter submiserunt transmissis ad nos pro suscipienda ordinacione nostra duobus de confratribus monasterii ipsius procuratoribus ad hec specialiter constitutis cum litteris patentibus sigillorum abbatis et conuentus munimine roboratis sepedicto Iohanne pro se personaliter comparente et nostram in hac parte ordinacionem expressius acceptante Nos igitur consideratis ipsius monasterii facultatibus pensatisque prefati Iohannis condicionibus ac circumstanciis omnibus in hoc negocio attendendis taliter deum habentes pre oculis super prouisione de qua agitur tenore presencium ordinamus uidelicet quod dictus frater Iohannes illa suo perpetuo ad inhabitandum habeat edificia cum suis appendiciis in monasterio de Egnesham in quibus Nicholaus quondam abbas eiusdem monasterii dum uixit habitare solebat Habeat etiam secum continue unum commonachum socium de conuentu quem sibi duxerit abbas qui pro tempore fuerit assignandum Habeat similiter unum scutiferum seu clericum loco scutiferi et unum garcionem qui in necessariis sibi seruiciis ualeant ministrare Habebit uero idem Iohannes ad persone sue sustentacionem de celario monasterii singulis diebus in pane et seruisia liberacionem monachorum duorum scilicet duos panes monachales in die et quatuor lagenas ceruisie conuentus Pro coquina uero et aliis sibi necessariis recipiet decem marcas sterlingorum de manerio de Stokes ad duos anni terminos uidelicet de annuo redditu sancti Iohannis Baptiste quinque marcas et de redditu Natalis Domini quinque marcas incipiente primo termino recepcionis huiusmodi in festo sancti Iohannis Baptiste anni domini m cc octogesimi primi Socius uero suus commonachus in esculentis poculentis indumentis et ceteris ad suam sustentacionem necessariis tantum de domo recipiet quantum monachus alius monasterii sepedicti Scutifer autem et garcio predicti similiter in omnibus necessariis tantum recipient quantum scutiferi et garciones abbatis Habebit etiam idem Iohannes de domo preter iamdicta potagium sal focalia stramina et alia huiusmodi minuta si qua sibi necessaria fuerint que sub prius nominatis noluerit racio comprehendi una cum octo libris cere singulis annis pro candelis suis sufficienter et honorifice pro se et sibi assistentibus prout ipsos decreuerit racio indigere Si quid uero ambiguitatis uel obscuritatis emerserit super hac nostra ordinacione illius declaracionem seu interpretacionem nobis ac nostris successoribus tenore presencium specialiter reseruamus Quia uero monachum sine obediencia uiuere non solum reputamus dampnabile sed absurdum intelligimus quod sub obediencia abbatis de Egnesham qui pro tempore fuerit uiuere debet Iohannes predictus et tam abbatem quam ipsum Iohannem quantum possumus in domino adiuramus quatinus abbas ipse illius meritis exigentibus mansuetum se ei non omittat ac beniuolum exhibere et frater ipse Iohannes hanc abbatis beniuolenciam quantum ualet studeat promereri necnon erga omnes et singulos de conuentu quantum in ipso est illesum seruare uinculum caritatis quod et omnibus de conuentu suademus quantum possumus ut faciant uice uersa Ut autem presens nostra ordinacio inexpugnabile robur optineat firmitatis sigillum nostrum presencium tenori duximus apponendum Dat[] apud Ghayden[] in Essexia x Kalendas Nouembris anno domini m cc octogesimo primo pontificatus nostri anno secundo

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.