Vniuersis [etc] Thomas filius Willelmi prepositi de Wolgarcote salutem in domino sempiternam Nouerit uniuersitas uestra quod cum religiosi uiri abbas et conuentus Egneshamie in uictum et uestitum in eorum monasterio quoad uixero liberaliter concesserint meque in fratrem eorum admiserint volens ego Thomas antedictus uicem pro uice graciam pro gracia pro posse rependere mera et spontanea uoluntate concedo eisdem et eorum monasterio quod omnia bona mobilia et inmobilia que in presenti possideo et que de cetero undecunque adquirere potero penes ipsos et ipsorum monasterium sine cuiuscunque contradiccione remaneant et quod ipsa bona post decessum meum ubicunque inuenta fuerint tanquam bona ipsius monasterii libere accipere occupare et uendicare ualeant ita quod ego de bonis ipsis nunc in presenti adquisitis et de cetero adquirendis nullo modo testari ualeam uel ipsa bona alio quocunque modo alienare uel in alium transferre quod si secus fecero quod absit volo et concedo quod testamentum ipsum et alienacio uel translacio si qua facta fuerit nullum seu nulla sit et uiribus careat omnimodis In cuius rei testimonium presentibus litteris sigillum meum apposui et ad maiorem rei euidentiam sigillum decanatus de Wodestoke apponi procuraui Datum apud Egnesham die sancte Scolastice uirginis anno domini m cc lxxx secundo

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.