In dei nomine Amen Constante per inquisicionem ad mandatum nostrum factam per dilectum in Christo filium S archidiaconum Oxonie super uero ualore omnium prouentuum ecclesie de Cherlebury cum suis capellis de Chadelingtone et Schorthamptone ut sic ad uicariam in dicta ecclesia abbati et conuentui de Egnesham appropriata per nos Oliuerum permissione diuina Lincolniensem episcopum ordinandam certius posset procedi quod dicti prouentus preter quasdam decimas in parochia eiusdem ecclesie quas una cum pensione quinque marcarum in ipsa ecclesia iidem religiosi solebant percipere ab antiquo ualent per annum centum marcas quodque alteragium de Cherlebury cum capella de Schorthamptone valet per annum xviii marcas et fenum decimale valet per annum ix marcas item totum alteragium de Chadelingtone ad viii marcas estimatur et fenum decimale ualet ibidem xl solidos annuatim quodque in dicta ecclesia de Cherlebury solebant esse duo capellani ad minus et hoc pro capella de Schorthamptone in qua ter in singulis septimanis diuina sunt celebranda et duo clerici ministrantes et in capella de Chadelingtone unus capellanus parochialis cum clerico continue moram trahens nos ad ualorem dicte ecclesie et onera ministrorum eiusdem oculos conuertentes vicariam in dicta ecclesia de Cherlebury uocatis hiis quorum interest et sufficienter comparentibus exnunc esse debere perpetuo ordinamus prouentus alteragiorum predictorum et totum fenum decimale tam apud Cherlebury et Schorthamptone quam apud Chadelyngtone necnon sexaginta quinque acras terre arabilis que sunt de dominico dicte ecclesie de Cherlebury cum omnibus pertinentiis suis et comoditatibus quibuscunque ad sustentacionem vicarii pro tempore inibi instituendi ac unius capellani secum moraturi quamdiu idem uicarius personaliter poterit ministrare et duorum capellanorum si ad celebrandum forsan impotens efficiatur scilicet pro ecclesia de Cherlebury et capella de Schorthamptone predicta in qua ter in ebdomada uicarius faciet celebrari et eciam vnius capellani parochialis ad capellam de Chadelyngtone residenciam continue facturi ac clericorum sufficiencium et omnium aliorum siue pro luminaribus siue pro aliis ad diuinum ministerium requirendis que per rectorem consueuerant exhiberi inueniendorum per uicarium in futurum assignantes ita quod nec idem uicarius aliquas decimas de dictis terris prefatis religiosis seu iidem religiosi vice uersa de suis bonis aut prouentibus quibuscunque eidem uicario soluere teneantur Ordinando eciam statuimus quod vicarius in dicta ecclesia omnimoda ornamenta in cancello quocunque nomine censeantur que rector inuenire solet et debet et etiam libros de cetero teneatur inuenire ita tamen quod dicti abbas et conuentus ea omnia hac uice iuxta ordinacionem archidiaconi loci reparent seu faciant fieri in bono statu Sed iidem religiosi quociens res exegerit reficient et reparabunt cancellum Ordinamus insuper quod uicarius sinodalia ac Letare Ierosalem et hiis similia ordinaria consueta persoluet sed religiosi archidiaconum procurabunt Onera uero dedicacionis et reconciliacionis ecclesie si ex causa sine culpa uicarii et suorum in futurum contingant quod absit dicti religiosi quoad procuracionem et alia tenebuntur subire Alia autem onera contribucionum siue in subsidium Terre Sancte siue alio modo dictam ecclesiam qualitercunque contingentium infuturum uicarius pro rata porcionis sue sicut equum fuerit declaranda pro tempore et similiter iidem religiosi pro rata porcionis sue agnoscent Demum uolumus et ordinamus quod uicarius in ecclesia de Cherlebury in fundo ecclesie dotali mansum habeat competens et per prefatum archidiaconum vice nostra in presencia et sub testimonio uirorum fidedignorum de parochia pro vitanda contencione imposterum certius limitandum sumptibusque dictorum religiosorum ab initio cum omnibus edificiis necessariis edificandum vt decet et in uilla de Chadelingtone pro capellano ibidem moraturo mansum similiter congruum in fundo dotali ecclesie designandum per archidiaconum et edificandum ut supra Ceterum quia secundum diuersitatem temporum status rerum uariatur quandoque et ex factis hominum dubietates interpretacione digne oriuntur frequenter ad augmentandam dictam uicariam si ad illius augmentacionem nobis et successoribus nostris uisum fuerit procedi debere necnon ad declarandum et interpretandum de plano si quid dubium obscurumue in premissis emerserit in futurum potestatem nobis et successoribus nostris specialiter reseruamus In quorum omnium testimonium sigillum nostrum presentibus est appensum Actum et datum apud Parcum Stowe xiii Kalendas Iulii anno domini m cc nonagesimo sexto et pontificatus nostri xviii

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.