Assisa capta coram I de Batesford et Ricardo Pike iusticiariis apud Kauersham in comitatu Oxonie die Sabbati proxima ante festum sancti Edwardi regis anno regni regis Edwardi filii regis Henrici uicesimo octauo finiente Assisa uenit recognitura si priorissa de Garynges et alii in breue iniuste etc disseisiuerunt abbatem de Egnesham de communa pasture sue in Garinges que pertinet ad liberum tenementum suum in eadem villa post primam etc et unde queritur quod disseisiuerunt eum de communa pasture sue in quingentis acris terre cum pertinenciis communandi in eisdem in quolibet tercio anno per totum annum et singulis duobus annis tempore aperto et etiam omni tempore quando tenementa predicta iacent inculta uel frisca cum omnimodis aueriis etc Et Hugo et omnes alii preter predictam priorissam et predictos Iohannem de la Dene et Walterum venerunt et predicti priorissa et Walterus non uenerunt nec fuerunt attachiati eo quod non fuerunt inuenti Ideo capiatur assisa versus eos per def[altam] etc Et predictus Iohannes de la Dene per Willelmum balliuum suum dicit quod ipse non disseisiuit etc Et predicti Hugo le Mareschall Robertus Willelmus et Iohannes le Warde dicunt quod ipsi nichil habent nec aliquid clamant in predictis tenementis nec aliquam iniuriam aut disseisinam inde fecerunt Et de hoc ponunt se super assisam etc Et predictus Hugo Duryual respondet tanquam tenens de ducentis acris terre in quibus predictus abbas clamat predictam communam etc et nichil dicit quare assisa remaneat etc Ideo capiatur assisa etc Iur[atores] dicunt super sacramentum suum quod predictus abbas habere debet communam pasture in predictis quingentis acris terre communandi in eisdem quolibet tercio anno scilicet tempore waretti per totum annum et singulis duobus annis quando predicta tenementa seminantur tempore aperto Et si contingat quod predicti Hugo priorissa et alii permittant aliquam partem predictorum tenementorum iacere friscam uel non seminatam in illis duobus annis quando seminari deberet tunc debet idem abbas communare in eandem cum omnimodis aueriis etc videlicet in illa parcella que seminari deberet semine yemali a festo sancti Petri ad Vincula usque ad festum Natalis Domini et etiam in particula illa que seminari deberet semine quadragesimali a dicto festo sancti Petri usque ad Pascha Et dicunt quod idem abbas fuit in seysina de predicta communa sua etc tanquam pertinente etc communandi in eisdem tenementis cum omnimodis aueriis suis in eadem forma predicta quousque predicti Hugo et alii ipsum inde iniuste etc disseisiuerunt Ideo consideratum est quod predictus abbas recuperet seysinam suam de predicta communa sua communandi in predictis tenementis cum omnimodis aueriis suis ista eadem forma per iur[atam] superius expressa per visum eorundem et dampna sua que taxantur per eosdem ad lx solidos Et predicti Hugo et alii in misericordia etc Nomina iuratorum eiusdem assise Willelmus de Scalebroke Robertus de Stoke Iohannes Romeyn Willelmus de Draycote Radulfus de Pilesedichs Galfridus de Leukenor Robertus Neel de Purye Robertus de Lusches Alexander de Lachesforde Iohannes Brokepeny Gilbertus Tyrel Petrus Oliuer

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.