Uniuersis sancte matris ecclesie filiis ad quos presens scriptum peruenerit Stephanus de Balliolo rector ecclesie de Mitford salutem in domino Noueritis me teneri et firmiter obligari magistro Waltero de Foddringhey principali et sociis suis scolaribus domus dicte de Balliolo Oxonie in quadraginta nouem libris bonorum et legalium sterlingorum soluendis eisdem Oxonie uel suo certo attornato has litteras deferenti ad terminos subscriptos uidelicet ad festum sancti Martini in hyeme anno domini mcclxxx quarto decem libras et ad mediam Quadragesimam proximam sequentem nouemdecim libras et decem solidos et ad festum Pentecosten proximo sequens nouemdecim libras et decem solidos sine aliqua contradiccione uel cauellacione seu ulteriori dilacione ad quam solucionem dicte pecunie plenarie faciendam loco et terminis supradictis obligo me et omnia bona mea mobilia et immobilia ubicumque fuerint inuenta cohercioni cuiuscumque iudicis ecclesiastici et precipue domini R Cancellarii Uniuersitatis Oxonie et successoris eius qui pro tempore fuerit dominorum episcoporum Dunelmensis et Lincolniensis et eorum officialium quem horum maluerint eligere scolares predicti qui licite sine cause cognicione possint me compellere non solum per sequestracionem bonorum meorum uerum eciam per sentenciam excommunicacionis quam sine strepitu iudicii uolo in me fulminari de die in diem per eosdem uel eorum quemcumque si contingat me quod absit in solucione dicte pecunie loco et terminis predictis in toto uel in parte deficere Obligo eciam me in forma qua prius ad satisfaciendum dictis scolaribus tam de dampnis quam expensis si que uel quas contigerit eos incurrere pro defectu solucionis pecunie predicte modo predicto plenarie non facte Et ad maiorem huius rei securitatem dominum Hugonem de Euyr germanum meum fideiussorem inueni qui presentis scripti tenore non solum se fatetur fideiussorem uerum eciam se constituit principalem debitorem qui se obligat per omnia bona sua cohercioni et districcioni cuiuscumque iudicis ecclesiastici uel secularis prout melius poterit scolaribus predictis prodesse et sibi magis obesse tam ad restitutionem dampnorum et expensarum quam principalis debiti si contingat me in aliquo predictorum deficere nichilominus ad omnia supradicta fideliter obseruanda corporale prestiti sacramentum In cuius [etc sealing] Dat[] apud Donelmum die dominica proxima ante festum sancti Dionisii anno domini supradicto

Source Fulltext: Oxford Balliol Deeds. H. E. Salter. Oxford Historical Society, V.64. Oxford Historical Society. Clarendon Press. Oxford. 1913.