Wie Heinric vanden Hove ende Jehan Scotelinc, scepenen ende Coriers in Veurne ambocht, doen te wetene allen lieden dat een ghescil ende een debaet was tusschen werden ende religieusen lieden den abt enten conventen vanden Dunen an deene side, ende Pietre Spaden, poortere in Vuerne an dandre side, als om eene plaetse lands houdende achte ende dertech roeden, lettel min of meer, die men heet Haecswech, ligghende binnen der prochie van Coden- kerke, inder vorseide religieusen liede land, bezuden der Herstrate recht zuut vanden hove vanden Boongaerde, welke vorseide plache elke partie vorseid drouch an hare over haren grond, op twelke ghescil de vorseide partien droughen overeen dat elc haerre zoude nemen eenen man ende die twee zouden ondervinden an douderinghe ende an dommesaten van- der ghebuurten, wien dat de vornoomde plache lands toebehoren mochte metten rechte. So dat de vorseide religieusen namen over haren man Janne Lippin, ende Pieter Spade vorseid nam Ermoude Coppins over den sinen, dewelke twee als vinders inde vorseide zake ghinghen te gader ende hoorde douderinghen ende dommesnteii in der maniere dat het vor- seid es. Ende camen vor ons als vor scepenen ende coriers vorseid, ende beede eens wesende seiden haren segh in der manieren dat hier naer volght, dats te wetene naer al dats vor- hemlieden comen was ende zys vonden hadden dat de vornoomde plache lands sculdech was ervelike toe te behorene, den religieusen vorseid, behouden dies dat de vorseide Pieter over dese vorseide plache wech hebben zoude naer wet ende costume van den lande van Vuerneambocht tote eenen leengoede dat hi hadde, ligghende bezuden der plache lands vor- seid. In kennessen der waerheden hebben wie scepenen ende coriers vorseid ten verzouke vanden vornoomden partien dese lettren bezeghelt met onsen propren zeghelen huuthan- ghende, die was ghemaect int jaer ons Heren als men screef dusentich driehondert twee ende zestich.

730