Wy Lodewyc grave van Vlaendren, van Nevers ende van Rethel doen te wetene allen lieden dat wy, om eenigherhande grief ende vexeringhen die wy verstaen dat eenighe lieden, ute willen doen onsen goeden vrienden den abd ende covent vander Does, hebben ghenomen ende nemen bi desen letteren hemlieden ende alle de persoenen, meisnieden, goet, besten hemlieden toe behorende waer sy syn, ende haren cloester gheheel, in onse goede zekere ende vrye bescermenesse, protectie ende sauvegarde, jeghen alle mannen van lieden ombieden ende bevelen scarpelike allen onsen ondersaten wie zy syn, edele of onedele, ende elken bi hem, up al dat zy houden van ons, dat zy den vorseide persoenen, cloester no goede iet vexeren no mogen, bute wette, no bute redenen, ende oec allen onsen baillius, wethouders ende officiers, ende elken dies verzocht zal syn, inde zake dat zy of hare goet vorseid iet van yemene ghevexere ende mesleet waren, dat zy staphants zonder letten , dat doen weder in state, als te behoren zal, de mesdadighe corrigierende met vanghenessen ende anders alsoe dertoe behoren zal, zoe dat sys ofstaen ende hem anders der bi castien. Dit ghebieden wy elken van ulieden zoe te doene dat in u gheene faute derof zy als lief als ghy ons hebt, want wyt om zekere zaken alsoe willen. Ghegheven te Ghent, den achtsten dach van Hoymaent, int jaer ons Heren M. CCG. neghene ende viertich.

Bi min here den Grave present min here van Reninghe, Suliex ende wi, H. Vueders.