Ego Stephanus Dei gratia Eduensis episcopus, notum fieri volo presentibus et futuris quod Renerius de Frolesio concessit fratribus de Fonteneto quicquid habebat de proprio dominio et quicquid Girardus Pilosus et Gilebertus de Colomeis et Obertus Villanus tenebant ab Hugone de Chaace a ponte Saigniaci sicut via ducit versus Aringias et sicut rivus Aringiarum ducit usque in aquam Brane preter censum quem annuatim reddunt monachi militibus supradictis videlicet xii solidos et dimidium. Cujus census medietatem adquirere poterunt predicti monachi sive per elemosinam sive per emptionem. Concessit etiam eisdem fratribus predictus Renerius quicquid poterunt adquirere legitime ab heredibus Radulphi de Saigniaco et Roberti fratris ejusdem Radulphi infra prescriptos terminos. Hec omnia laudaverunt filii ejusdem Renerii, Pontius, Adam, Milo. Hujus rei testes sunt Odo archipresbiter Tullionis , Haymo archipresbiter Flaviniaci , Girardus Guununs , Petrus clericus. Predictus etiam Renerius recognovit in presentia Gaucherii abbatis Flaviniaci , Johannis monachi, Teobaudi Seebrant , Stephani Bufran , Laurentii molendinarii hoc sic fuisse factum et laudatum.