Ego Gauterius, Dei gratia Eduensis episcopus, notum facio presentibus et futuris quod Oliverius de Grinione laudavit et concessit Deo et fratribus Fonteneti1 ecclesie omnes elemosinas quas pater suus et fratres sui eidem ecclesie fecerant, simul et terram que dicitur Mont Arlant in bosco et plano. 2 Ita tamen quod fratres Fonteneti et homines Oliverii boscum non exartabunt, terras autem planas fratres Fonteneti sine ulla custuma arare et excolere. Porro quicumque predictam terram excolere voluerit fratribus de Fonteneti tercias reddet, preter homines Oliverii quantum ad ipsius attinet porcionem. Et quia discordia erat inter Oliverium et fratres Fonteneti de vadis concordatum est quod idem fratres solitum vadum suum ita aptabunt et component ut per illud sine periculo transire possint. Si vero vadum aliquo casu ita dirutum fuerit ut per ilud transire non possint, per alia vada ubi poterunt libere et quiete transibut donec vadum suum emendare possint. Per prata libere et quiete predicti fratres carricabunt omni calumpnia et actione remota, excepto quod si per segetes aut prata non secata aliquod dampnum fecerint. Ipsum dampnum quantum legitime appreciatum fuerit sine alia emendatione restituent, pasturas et omnes aasentias animalibus et pastoribus necessarias per totam terram suam ubicumque sit quas predicti fratres in vadio habebant pro quingentis solidis Oliverius fratribus Fonteneti sine aliqua retentione in elemosinam bona fide dedit et concessit. Propter quod ei jam dicte summam pecunie Fontenetenses remiserunt. Preterea concessit Oliverius quod si dominus Osbertus de Joux in terra sua que de chasamento Oliverii est ecclesie Fonteneti elemosinam facere voluerit usque ad xii carratas feni quales conversi facere solent libere accipiant Fontenetenses. Pro hiis omnibus Oliverius de beneficio ecclesie excepta predicta pecunia ccc tos solidos habuit. Hujus rei testes sunt Josbertus abbas Fonteneti et cum eo iii monachi Philippus, Bernardus et Humbertus, Odo archipresbiter Tullionis , Races capellanus de Lucennaco , Eniaubus de Puteolis , Renerius de Frollesio , Milo de Lantille , Renerius de Sancta Columba , Willermus Huldrei , Willermus de Curte Rabodi . Hec omnia laudavit Floria uxor Oliverii cum duobus filiis suis Pontio et Hugone. Unde testes sunt Bernardus de Grinun , Hugo de Quinci , monachi Fonteneti, et duo conversi frater Rainadus magister Flaceii et frater Waldricus ; Willermus Uldrez et Petrus de Valle . Postea querelam movit Fontenetensibus Oliverius de prato quod ab homine suo emerant et de quodam fossato quod ante molidinum suum fecerant propter quod molendinum suum plurimum deterioratum fuisse et se urgens dampnum inde recepisse dicebat et terra sua quam eo nesciente ad lavam trahendam ruperant et excavaverant. De hiis abbas Fonteneti et Oliverius posuerunt se super hos iiii or, scilicet Pontium de Frollesio , Odonem archipresbiterum, Philippum de Curte Rabodi , Teobaudum prepositum Montis Barri , qui concorditer dixerunt quod Oliverius de prefato molendino justam querimoniam non haberet. Pro aliis vero querelis omnibus pacificandis dixerunt predicti dictores quos abbas Fonteneti de beneficio ecclesie carta ista sigillata Oliverio x libras daret. Hinc testes sunt Josbertus abbas Fonteneti , Philippus de Curte Robodi , Bernardus de Grinun , Johannes Montis Barri , Odo archipresbiter, Poncius de Frollesio , Odo de Marmania , Teobaudus prepositus Montis Barri , Petrus avunculus ejus, Milo Corbille . Nos quoque ad testimonium horum atque munimen presenti carte sigillum nostrum apponimus et hiis scienter obviantes anathemate condampnamus, anno ab incarnatione Domini m° c° xc° i°.