Henricus, Dei gratia Eduensis episcopus, omnibus pacem sectantibus salutem et benedictionem. Presentibus et futuris hujus carte scripto notificamus concordiam in nostri presentia factam inter monachos de Fonteneto et Renerium de Frolesio . Monachi in finagio grangie sue Flaciaci et in Alteris Vallibus terras habebant adcensitas a quibusdam militibus, Girardo videlicet et Piloso, Gileberto de Columberiis et Oberto Villano qui eas tenebant in chasamento ab Hugone de Chaace , cujus filiam in matrimonio predictus Renerius habebat, ideoque terras illas sibi competere et sui juris esse dicebat. Hac de causa vexabat et causabatur monachos asserens nunquam se nec socerum suum Hugonem predictas adcensias laudasse. Econtra dicebant monachi se easdem terras tenere primum quidem cum laude Hugonis de Chaaceio deinde cum laude ipsius Renerii. Auditis itaque partis utriusque allegationibus ad judicium misimus et judicatum est quod si testes haberent monachi de laude Hugonis suam rite causam peregissent et a causa Renerius excidisset. Tunc monachi testes produxerunt duos religionis Andream videlicet de Curtenge , Teobaudum de Grisine et duos seculares Robertum scilicet de Sancta Columba et Calonem de Grinione qui se loco et colloquio dicerent affuisse quando predictus Hugo ecclesie Fonteneti predictas terras laudavit. Iterum judicatum est ut si duo religiosi super veritatem suam et ordinem se id vidisse et audisse testarentur et duo seculares idem jurejurando firmarent sufficeret monachis sicque Renerius querelam omitteret. Quod ita factum est. Andreas namque monachus et Theobaudus conversus veraciter se hoc audisse et vidisse testati sunt, Robertus autem de Sancta Columba et Calo de Grinione super sancta idem juraverunt. Actum apud Tullionem in nostri sicut ante diximus presentia presente etiam domno Arnaudo abbate Fonteneto cum monachis his : Willermo de Scharleis , Odone de Pultariis , Milone de Tilyo . Unde testes sunt hii : magister Audebertus Sedeloci decanus, Jordanus Tullionis archipresbiter, Hugo Pulleniaci archipresbiter, Wido de Venerre , Willermus Buro , Hugo de Turre , Gilebertus de Grisine , Wido Varrellus , Symon de Curtenge , Renaudus major Tullionis , Gilebertus frater ejus et Paganus Cocus de Lucennaco . Ad munimen ergo rei hujus presenti carte sigillum nostrum apponimus et siquis deinceps contraire presumpserit eum penitus nisi resipuerit anathematizamus.