Ego Henricus Dei gratia Augustudunensis episcopus tam futuris quam presentibus notum facio quod Richardus de Curte Rabodi gravi apud Fontenetense monasterium infirmitate detentus mortemque sibi suspicans imminere, divine tamdem visitationis inspiratione compunctus quod ejusdem loci fratres diu multumque sine causa vexasset, satisfacere statuens dedit eis pro anima sua et antecessorum suorum quicquid ipsius erat in loco qui Curtresum dicitur juxta quod subscripti declarant termini. A rupe videlicet que ad ulmum Sebaldi incipit usque ad boscum Eperi et rivum Jalegni . Itemque a rivo sicut ipse fluit usque ad viam publicam, a via autem sicut ipsa ducit usque in fines Marmanie. Porro ab ipsis finibus per rupem quamdam nativam que est in cumba, cui nomen Villamontosi, usque ad prefatam ulmum Sebaldi. Dedit preterea quicquid illi erat alodii in villa seu finibus Fraxini, chasamentum quoque cum a dominis tamen adquirere potuerint. Dedit etiam de adjacente abbatie foresta ligna ad calefaciendum perpetuo furnum necessaria. Huic donationi ejus testes affuerunt qui subnotati sunt Andreas Montis Barri dominus, Vido de Venerri , Rogerius patruus ejus, Viardus Oliverii filius , Symon de Curtengi , Hugo de Plaaneto , Bernardus Nariouz , Calo de Grinum , Bernardus Braibanzuns , Christianus Erlauz , multique alii qui ad eum visitandum convenerant.