Lucius episcopus, servus servorum Dei, dilectis filiis Bernardo abbati monasterii de Fontaneto ejusque fratribus tam presentibus quam futuris regularem vitam professis, in perpetuum1. Honestas2 et religio vestra monent nos propensius et inducunt, ut quantum cum Deo et justitia fieri potest, commodis et profectibus vestris propensius intendamus, et ne possitis in posterum super his quae possidetis aliquorum malignitate vexari apostolicum vobis suffragium volumus impertiri. Eapropter, dilecti in Domino filii, vestris justis postulationibus clementer annuimus et prefatum monasterium in quo divino mancipati estis obsequio ad exemplar predecessorum nostrorum sanctae recordationis Eugenii et Alexandri Romanorum pontificum sub beati Petri et nostra protectione suscipimus et presentis scripti privilegio communimus. In primis siquidem statuentes ut ordo monasticus qui secundum Dei timorem et beati Benedicti regulam atque institutionem Cisterciensium fratrum in vestro monasterio institutus esse dinoscitur perpetuis ibidem temporibus inviolabiliter observetur. Preterea quascumque possessiones quaecumque bona idem monasterium in presentiarum juste et canonice possidet aut in futurum concessione pontificum, largitione regum vel principum, oblatione fidelium seu aliis justis mudis prestante Domino poterit adipisci, firma vobis vestrisque successoribus et illibata permaneant in quibus propriis duximus exprimenda vocabulis : vallem ipsam in qua eadem abbatia sita est, cum omnibus finibus suis ; grangiam Carmeti cum omnibus appenditiis suis, dona Stephani Eduensis episcopi 3 de terris et asentiis suis, scilicet terras ad excolendum sine tertiis, pasturas animalium, pastionem porcorum, nemora ad edificandum et ad omnem usum etiam ad ardendum in agricultura, grangiam de Estormer et territorium Novillae Montis cum omnibus decimis et appenditiis suis, grangiam de Planeto cum omnibus appenditiis suis, grangiam Fontanarum cum appenditiis suis, elemozinam quam vobis Rogerius de Curte Rabodi donavit, scilicet quidquid habebat apud Lanias, dona Rainardi domini Montis Barri de asentiis suis et in pasturis suis, grangiam Puteoli cum omnibus appenditiis suis, grangiam Flacciaci cum omnibus appenditiis suis, dona et helemozinas Hugonis de Curte Rabodi et filiorum ejus Willermi, Hugonis et Ricardi, dona et helemozinas Bartholomei de Fraxino et Willermi filii ejus, grangiam de Morvilla cum omnibus appenditiis suis, locum Sancti Aniani cum omnibus appenditiis suis, grangiam Aringiarum cum omnibus appenditiis suis, vineas vestras de Divione, vineas de Villenis, vineas de Flaviniaco, emendi quoque et vendendi sine omni consuetudine vel exactione in villa Flaviniacensi sicut rationabiliter est vobis concessum et hactenus noscitur observatum fuisse facultatem liberam habeatis. Sane laborum vestrorum quos propriis manibus aut sumptibus colitis sive de nutrimentis vestrorum animalium decimas a vobis nullus presumat exigere. Si qua vero libera et absoluta persona pro redemptione animae suae vestro se monasterio conferre voluerit suscipiendi eam facultatem liberam habeatis. Adjicimus etiam ut nulli fratrum vestrorum post factam in monasterio vestro professionem absque abbatis sui licentia de claustro liceat discedere. Discedentem vero absque communium litterarum cautione nullus audeat retinere. Paci quoque et tranquillitati vestrae paterna sollicitudine providentes aucthoritate apostolica prohibemus ut infra clausuram locorum sive grangiarum vestrarum, nullus violentiam vel rapinam seu furtum facere vel hominem capere audeat. Statuimus preterea ut in eodem loco abbas secundum consuetudinem Cisterciensis ordinis fratrum per providentiam Clarevallensis abbatis cum consensu et electione fratrum monasterii vestri secundum beati Benedicti regulam instituatur, qui proprio episcopo tanquam spiritali patri obediat, salva nimirum Cisterciensis ordinis institutione ad haec. Ne ad perturbationem quietis vestrae alicui ecclesiasticae secularive personae de vicinitate loci ulla prebeatur occoasio, in terris vestris aut ita prope abbatiam vel grangias vestras quod inde vobis videatur merito scandalum generari, seu quies vestra turbari sive etiam in illis locis in quibus in perpetuum concessa usuaria vel pasturas habetis, ut inde graviter impediri, vel ea prorsus amittere debeatis, habitationem aliquam fieri aucthoritate apostolica prohibemus. Decernimus ergo ut nulli omnino hominum liceat prefatum monasterium temere perturbare aut ejus possessiones auferre vel ablatas retinere, minuere, seu quibuslibet vexationibus fatigare, sed omnia illibata et integra conserventur, eorum pro quorum gubernatione et sustentatione concessa sunt usibus omnimodis profutura, salva sedis apostolicae aucthoritate. Si qua igitur in futurum ecclesiastica secularisve persona hanc nostra constitutionis paginam sciens contra eam temere venire temptaverit, secundo tertiove commonita, nisi presumptionem suam congrua satisfactione correxerit, potestatis honorisque sui dignitate caveat, reamque se divino judicio existere de perpetrata iniquitate cognoscat et a sacratissimo corpore et sanguine Dei et domii redemptoris nostri Jesu Christi aliena fiat, atque in extremo examine districtae ultioni subjaceat. Cunctis autem eidem loco sua jura servantibus sit pax domini nostri Jesu Christi quatinus et hic fructum bonae actionis recipiant et apud districtum judicem praemia eternae pacis inveniant. Amen, amen.

Ajoute : "Sic signatum" rota Sanctus Petrus, Sanctus Paulus, Lucius papa tercius.

Ajoute : "Et in legenda"Adjuva nos Deus salutaris noster.

Ego Lucius catholicae ecclesiae episcopus.

Souscriptions copiées sans retour à la ligne Croix, mentions de souscriptions et abréviations ajoutées selon le formulaire pontificalEgo TheodunusPortuensis et sanctae Rufinae sedis episcopus.

Ego Petrus presbiter cardinalis tituli sanctae Susannae.

Ego Vimarus tituli sancti Stephani in Celio Monte presbiter cardinalis.

Ego Arduinus presbiter cardinalis, tituli sanctae Crucis.

Ego Laborans presbiter cardinalis Sanctae Mariae trans Tiberim, tituli Calixti.

Ego Jacintus diaconus cardinalis sanctae Mariae in Cosmydin.

Ego Rainerius Sancti Georgii ad Velum aureum, diaconus cardinalis.

Ego Gratianus sanctorum Cosmae et Damiani diaconus cardinalis.

Datum Velletry, per manum Hugonis sanctae Romanae ecclesiae notarii, tertio nonas decembris, indictione prima, incarnationis dominicae anno millesimo centesimo octogesimo secundo, pontificatus vero domini Lucii papae tertii anno secundo.