Lucius episcopus, servus servorum Dei, venerabilibus fratribus Lugdunensi archiepiscopo et suffraganeis ejus, et dilectis filiis abbatibus, archidiaconis, prepositis et aliis ecclesiarum prelatis in eorum partibus constitutis salutem et apostolicam benedictionem.

Audivimus et audientes mirati sumus quod, cum fratribus de Fontaneto sicut aliis omnibus Cisterciensis ordinis a patribus et predecessoribus nostris concessum sit et a nobis postmodum confirmatum ut de laboribus quos propriis manibus aut sumptibus excolunt nemini decimas solvere teneantur, quidam ab eis nihilominus contra indulgentiam sedis apostolicae decimas exigere et extorquere presumunt, et sinistra interpretatione apostolicorum privilegiorum capitulum perververtentes asserunt de novalibus debere intelligi ubi de laboribus est inscriptum. Quoniam igitur manifestum est omnibus qui recte sapiunt interpretationem hujusmodi perversam esse et intellectui sano contrariam cum secundum capitulum illud a solutione decimarum tam de terris illis quas deduxerunt vel deducunt ad culturam quam etiam de terris cultis quas propriis manibus vel sumptibus excolunt sint penitus absoluti, ne ullus contra eos hanc materiam malignandi vel quomodo liber ipsos contra justitiam molestandi per apostolica scripta vobis precipiendo mandamus quatinus omnibus qui vestrae sunt potestatis aucthoritate nostra prohibere curetis ne a memoratis fratribus de Fontaneto vel a fratribus aliorum monasteriorum Cisterciensis ordinis qui in partibus vestris consistunt de novalibus vel de aliis terris quas propriis manibus aut sumptibus excolunt vel de nutrimentis animalium decimas presumant quomodolibet extorquere. Nam si de novalibus voluissemus tantum intelligi, ubi ponimus de laboribus, de novalibus poneremus sicut in privilegiis quorumdam apponimus aliorum. Quia vero non est conveniens ut contra districta sedis apostolicae temere veniatur quae obtinere debent inviolabilem firmitatem per apostolica scripta vobis precipiendo mandamus ut si qui canonici, clerici, monachi vel laici contra privilegia sedis apostolicae predictos fratres decimarum exactione gravaverint appellatione remota laicos excommunicationis sententia precellatis. Reliquos autem ab officio suo supendatis et tam exommunicationis quam suspensionis sententiam faciatis usque ad dignam satisfationem inviolabiliter observari. Ad haec presentium vobis aucthoritate precipiendo mandamus quatinus si qui in fratres predictorum monasteriorum manus violentas injecerint eos accensis candelis excommunicatos publice nuntietis et faciatis ab omnibus sicut excommunicatos districtius evitari, donec congrue satisfaciant predictis fratribus, cum litteris diocesani episcopi rei veritatem continentibus apostolico se conspectui representetur.

Datum Velletri, quarto nonas octobris.