Alexander episcopus, servus servorum
Dei, dilectis filiis abbati et fratribus Flaviniacensibus et burgensibus ejusdem loci salutem et
apostolicam benedictionem. Ex parte dilectorum filiorum nostrorum abbatis et
fratrum
Fontanentensium
2
gravis est ad nos querela perlata quod vineas, quas eis cum decimis
apostolicae sedis privilegio confirmavimus et de quibus annuum censum partim
vobis, filii monachi, partim burgensibus more aliorum vicinorum tam clericorum
quam laicorum annis pluribus reddiderunt, tempore vindemiarum dissipantes,
quosdam de fratribus ipsis ausu nefario invasistis et ipsis dampnum non modicum
inferentes, decimas vinearum suarum auferre non dubitastis ; terram quoque, quam
in eodem territorio vacantem sub annuo censu cum vineis longo tempore
possederant, de palmitibus earumdem vinearum plantari fecistis. Cumque vobis,
filii monachi, et R., quondam abbati
vestro, scripta nostra miserimus, mandantes ut decimas
prescriptarum vinearum restitueretis et de cetero super eisdem decimis nullam
inferretis molestiam, nec ille nec vos mandato nostro, sicut decuit,
obtemperastis nec ab eorum gravamine vestras voluistis manus aliquatenus
continere. Quia igitur, quanto predicti abbas et fratres majoris religionis et
honestatis habentur et beato Petro et nobis magis sunt devoti, tanto gravius et
molestius reputamus, si quod eis incommodi vel detrimenti super vineis aut
decimis, quae sibi auctoritate privilegiorum Romanae ecclesiae confirmatae sunt,
intulistis per apostolica vobis scripta precipiendo mandamus et in virtute
obedientiae precipimus ut ab indebita molestia et infestatione predictorum
abbatis et fratrum penitus desistentes eis prescriptam terram plantatam cum
prelibatis vineis et earum decimis sine mora et difficultate qualibet
restituatis et quiete ac pacifice dimittatis, de dampnis vero et injuriis
illatis congrue satisfaciatis aut super his omnibus in presentia venerabilium
fratrum nostrorum
Bellicensis
et
Maurianensis
episcoporum plenam justitiam appellatione remota exhibeatis. Nos
enim eis dedimus in mandatis, ut vos ad alterum horum efficiendum aucthoritate
nostra moneant et districte compellant. Datum Anagniae, decimo quinto3 calendas julii.