Innocentius episcopus seruus seruorum dei. Dilectis filiis ... electo Secovensi, ... de Frisiaco et ... de sancto Virgilio ecclesiarum prepositis Salzburgensis dyocesis salutem et apostolicam benedictionem. Querelam venerabilis fratris nostri episcopi Frisingensis recepimus continentem, quod nobiles viri ... comes de Tyrol, Hainricus et Ot. de Welfsperch fratres Curiensis et Brixinensis dyocesis ipsurn quibusdam reditibus et rebus aliis ad eum de iure spectantibus contra iusticiam spoliantes, redditus ipsos per septennium pro sue uoluntatis libito(f) perceperunt in ipsius preiudicium non modicum et grauamen. Vnde dictos nobiles rogandos duximus attentius et monendos nostris sibi datis litteris in mandatis, ut eidem episcopo redditus ipsos et alia sine qualibet difficultate restituere et de perceptis satisfactionem congruam ut tenentur, exhibere procurent. Quo circa discretioni vestre¹ per apostolica scripta mandamus, quatenus si dicti nobiles mandatum nostrum neglexerint adimplere, nos eos ad id monicione premissa per censuram ecclesiasticam appellatione remota cogatis, constitutione de duabus dictis in concilio generali edita non obstante. Quod si non omnes hiis exequendis potueritis interesse, duo vestrum ea nichilominus exequantur. Datum Lugduni, II. nonis Augusti, pontificatus nostri anno tercio.

Source Fulltext: ZAHN, Codex Diplomaticus (=FRA II/31, Wien 1870) S. 139-140