L. dei gracia archidiaconus Carniole et Marchie iudex a sede apostolica delegatus discreto viro domino Wernhero plebano in Welc~ salutem in omnium saluatore. Cum in causa nobis a sede apostolica quem magister H. canonicus sancti Andree Frisingensis mouet contra uenerabilem dominum . . . . electum Lauentensem ac eius uiearium super ecclesia sancti Petri Salzburgensis diocesis, ceperimus procedere et magister C. canonicus sancti Viti Frisingensis procurator ipsius magistri H. quedam capitula siue articulos qui pro intencione ipsius magistri H. plene facere uidentur, quos etiam per testes qui difficulter nostro se possunt presentare conspectui, probare intendit, ediderit coram nobis, auctoritate apostolica uobis damus districtius in mandatis, quatinus testes idoneos quos idem C. procurator uel ipse magister H. super articulis coram nobis propositis probandis uel quibuscunque aliis que amminiculum cause prebere(!) uidentur, coram uobis proponendis produxerit in loco qui dicitur superior Welz, exacto et prestito primitus ab eis iuramento de ueritate dicenda, secreto et sigillatim prout ius exigit audiatis, secundum iuris debitum singulos sollicite examinantes, dicta ipsorum clausa nobis fideliter remittatis. Vt autem mandatum nostrum debitum possit sortiri effectum, auctoritate nobis commissa plenam uobis damus facultatem testes qui fuerint nominati, si se gracia odio uel timore subtraxerint, compellendi per censuram ecclesiasticam et omnia alia faciendi tam circa testes quam alias etiam personas que qualitas huius negotii uobis commissi exigit et requirit. Datum apud Laibacum, nonis Octobris, anno domini M. CC. LXII., indictione V.

Source Fulltext: ZAHN, Codex Diplomaticus (=FRA II/31, Wien 1870) S. 233-234