Nos Meinhardus dei gratia comes Goritie et Tirolensis et Aquilegensis, Tridentine et Brixinensis eeclesiarum aduocatus notum facimus omnibus tam presentibus quam futuris, quod post sopitas mediante domini Friderici venerabilis prepositi Frisingensis ecclesie arbitrio discordias que super predio et castro in Intica inter dominum Chunradum venerabilem episcopum Frisingensem ex parte vna et nos ex altera uertebantur, totum predium et castrum Haberberch in Intica situm cum omnibus eorum iuribus et attinentiis dicto domino nostro restituimus episcopo Frisingensi, exceptis duobus prediis Wal et Aufchirchen que uoluimus sine preiuditio utriusque partis manere in suspenso donec aput Inticam vicesimo die post recepcionem litterarum dicti domini episcopi quas nobis super hoc direxerit, mediante iustitia discutiatur quis ex nobis ius habeat in prediis memoratis, ad quem vicesimum diem et locum sub testimonio presentium nos compromittimus finaliter accessuros si non valde legittimis et arduis negotiis tunc fuerimus impediti, quibus cessantibus ad prefatum locum in alio termino ab ipso domino episcopo ad nostras preces prorogato super eodem negotio terminando finaliter accedemus. Expressionem vero penarum ipsius domini nostri et nostro arbitrio explanandam usque ad prefatum diem et locum etiam distulimus quibus debent dictus episcopus uel eius successores subiacere, si in solutione viginti marcarum illius terre ponderis sev ducentarum librarum paruulorum Veronensium occasione deffensionis de predio in Intica nobis facienda annis singulis circa festum beati Martini postquam a nobis ammoniti fuerint, negligentes inuenti fuerint aut remissi, uel si dampnum nobis infra spatium trium mensium etiam post ammonitionem non emendauerint, quod de castellanis prefatum Haberberch inhabitantibus per eorundem conspirationem in nostrum preiuditium et grauamen factam nobis fuerit irrogatum. In huius itaque rei euidens testimonium presentem paginam nostri sigilli munimine iussimus roborari. Datum aput Tyrol, anno domini M. CC.LX. VI., VII. idus Februarii.

Source Fulltext: ZAHN, Codex Diplomaticus (=FRA II/31, Wien 1870) S. 274-275