Ottacharus dei gracia rex Bohemie, dux Austrie et Stirie, marchio Morauie vniuersis capitaneis, iudicibus, officialibus atque venatoribus suis per Austriam constitutis graciam suam et omne bonum. Juri consentaneum et consonum videtur racioni, vt principibus per nostri dominium districtus habentibus redditus et possessiones qui nostris semper et ubique student affectibus complacere, principalis prerogatiue specialem graciam impendamus et eisdem cuiuslibet specialis solacii deductionem principaliter preparemus. Sane vobis singulis et vniuersis notum facimus per presentes, quod venerabili domino Chvnrado Frisingensi episcopo amico nostro karissimo, quocienscunque ipse aut venatores sui in predio Frisingensis ecclesie in Austria fuerint constituti, indulsimus de gracia speciali, vt venaciones pro sui solacii deductione per totum nostri districtus dominium valeat exercere, habeatque pro sue venacionis promocione in nostro districtu quod volge et schefwart wlgariter nuncupatur. Quapropter sub optentu gracie nostre vobis singulis et vniuersis precipimus et mandamus, vt nullus vestrum deinceps predictum episcopum aut suos venatores impedire debeat aliqualiter in premissis, sed pocius ipsum curetis in quibusque suis venacionibus fauorabiliter promouere. Et vt quilibet vestrum in hac parte nostris mandatis pareat sicut decet, prefato domino episcopo presentem cedulam tradidimus patentem nostri sigilli munimine roboratam. Datum aput Friestat, anno domini millesimo CC. LXVI., pridie nonas Decembris.

Source Fulltext: ZAHN, Codex Diplomaticus (=FRA II/31, Wien 1870) S. 281-282