Nos Petrus dei gratia Patauiensis ecclesie episcopus vniuersis presentes litteras inspecturis salutem in omnium saluatore. Quoniam ut ait apostolus, omnes stabimus ante tribunal Christi recepturi vnusquisque prout gessit in corpore, siue bonum fuerit siue malum, oportet nos diem extreme messionis misericordie operibus prevenire, nam qui parce seminat, parce et metet et qui seminat in benediccionibus, de benediccionibus et metet vitam eternam. Sane cum ecclesia sancti Stephani prothomartyris in Probstorf Patauiensis dyocesis propter seuiciam Comanorum grauiter sit destructa pariter et collapsa, ita quod sine sumptuoso opere non valeat reparari, et eidem ecclesie proprie non suppetant facultates, vniuersitatem vestrarm affectuose requirimus et rogamus in remissionem vestrorum vobis peccaminum in iungentes, quatenus elemosinas de bonis a deo uobis collatis in sub(si)dium et reparacionem prefate ecclesie velitis feliciter erogare, vniuersis vero qui ad fabricam ipsius ecclesie manum porrexerint adiutricem, quadraginta dies criminalium de iniuncta ipsispenitencia misericorditer relaxamus, Ad hoc nostrum prebemus consensum, ut reuerendi patres domini episcopi suas possint ad dicte ecclesie indulgencias subsidium condonare. Datum Wienne, anno domini M. CC. LXX., II. kalendas Februarii.

Source Fulltext: ZAHN, Codex Diplomaticus (=FRA II/31, Wien 1870) S. 307-308