Nos Ottakarus dei gracia Bohemie rex, dux Austrie, Styrie, Karinthie, marchio Morauie, dominus Carniole, Marchie, Egre ac Portusnaonis notum facimus vniuersis tam presentibus quam futuris, quod propter grata et fidelia que reuerendus in Christo pater dominus Chvnradus venerabilis Frisingensis episcopus amicus noster karissimus nobis sepius inpendit obsequia, eius precibus inclinati omnem avenam que wlgariter marichfuter dicitur, que de prediis Frisingensis ecclesie in Vmaruelt (!), Waidhoven et Holnstain nobis ad nostra granaria debebat dari annis singulis, de speciali gracia eidem domino episcopo et eius successoribus inperpetuum harum testimonio duximus relaxandam, volentes pariter et mandantes vt nullus procuratorum, iudicum vel officialium qui pro tempore in terra superioris vel inferioris Austrie vel alibi nostro nomine fuerint, de cetero huiusmodi avenam siue marichfuter a memorato domino episcopo vel a dictorum prediorum officialibus exigat vel requirat. Ne vero huiusmodi gracia vel tradicio sepedicto domino episcopo aut eius successoribus per nos propter sue fidei merita liberaliter et fauorabiliter facta possit a nobis et nostris heredibus uel ab aliis inposterum revocari, in perennem memoriam presentem paginam eidem domino episcopo et successoribus suis tradidimus nostrorum pendencium sigillorum munimine roboratam. Actum et datum aput Brunnam, anno domini M. CC. LXX. sexto, kalendis Maii.

Source Fulltext: ZAHN, Codex Diplomaticus (=FRA II/31, Wien 1870) S. 333-334