Rudolfus dei gracia Romanorum rex semper augustus. Tenore presencium notum fieri volumus vniuersis, quod nos obligacionem fori in Aspach cum suis attinenciis factam quondam Chunrado Frisingensi episcopo pro quingentis marcis argenti a quondam Friderico duce Austrie et Styrie qui ipsum forum cum eisdem attinenciis tenebat in feodum ab ecclesia Frisingensi, quem admodum (in) instrumentis ipsius ducis Austrie super hoc confectis vidimus contineri, ratam habemus atque gratam, quod inquam forum Chunradus venerabilis episcopus Frisingensis dilectus princeps noster qui nunc extat, karissimis filiis nostris Alberto. Hartmanno et Rudolfo ad peticionis nostre instanciam titulo contulit feodali, ita quod nos quamdiu vixerimus, ipsius fori conseruatores erimus et defensores, hoc pacto aposito et adiecto quod quandocumque nos vel aliquis filiorum nostrorum predictorum pecuniam quingentarum marcarum superius nominatarum venerabili Chunrado nunc ipsius ecclesie episcopo vel ipsius successori soluerimus, dictum forum ad nos tamquam conseruatorem et dictos nostros filios feodi nomine redeat absolutum. Huius rei testes sunt Fridericus venerabilis Salzburgensis ecclesie archiepiscopusr Bertoldus Babenbergensis, Petrus Patauiensis, Leo Ratisponensis, Ditricus Gurcensis, Johannes Chymensis, Wernhardus Seccouiensis ecclesiarum episcopi, Hainricus illustris comes palatinus Rheni dux Bawarie, Fridericus purchgrauius de Nv°renberch. Et nos in huius rei perenne testimonium presentes litteras nostre serenitatis sigilli munimine iussimus roborari. Acta sunt hec Wienne, anno domini millesimo ducentesimo septuagesimo septimo, XIIII. kalendas Junii, indictione quinta, regni nostri anno quarto.

Source Fulltext: ZAHN, Codex Diplomaticus (=FRA II/31, Wien 1870) S. 356