Ego Otto de Vinchenstayn notum facio uniuersis tam presentibus quam futuris, quod pro me et heredibus et amicis meis omnibus tam presentibus quam futuris sub testimonio presencium confiteor et protestor, quod nec conpulsus, nec coactus sed libere et absolute ad arbitrium reuerendi in Christo patris domini mei Bertholdi venerabilis episcopi Babbenbergensis cui dominus meus Rudolfus serenissimus rex Romanorum super hoc vices suas commiserat, renunciaui singulis et uniuersis exaccionibus, exeniis, stevris, pernoctacionibus, institucionibus et destitucionibus officialium et colonum (!) aliisque omnibus iuribus aduocacie quocumque nomine censeantur que uel quas pater meus pie memorie et alii progenitores et amici sev homines mei per totum predium Werdensis ecclesie actenus habuerunt et quas eciam per omnes mansos tam prepositi quam canonicorum eiusdem Werdensis ecclesie et super ipsorum homines exercuerunt, et obligo me atque promitto solummodo esse decetero contentum pro omnibus articulis prenotatis et aliis omnibus iuribus aduocacie eiusdem Werdensis ecclesie antedictis et uolo esse meos amicos et homines tam presentes quam futuros una mecum contentos annis singulis de triginta modiis siliginis quod wlgariter steverchorn dicitur, quod singulis annis per singulos mansos tam prepositi quam canonicorum secundum fertilitatem et sterilitatem temporis inponitur sev inscribitur, ita tamen quicquid per pestilenciam uel grandinem sev per gwerram siue per expedicionem uel eciam per alias causas legittimas in prefato siligine quod steverchorn dicitur defecerit, quod illud eciam de summa eorundem triginta modiorum debeat resecari ad taxacionem officialis prepositi memorati qui assumptis sibi duobus colonis de predio prestabit super hoc iuramentum. Item promitto pro me et pro meis heredibus et amicis sev hominibus presentibus et futuris, solummodo me esse contentum de quatuor marcis denariorum Frisacensium annis singulis circa festum beati Georii persoluendis, ita tamen quod pro quolibet denario Frisacensi duodecim Veronenses circa prefatum terminum persoluantur. Insuper promitto pro me et meis heredibus amicis et hominibus tam presentibus quam futuris omnes clausulas habere ratas et firmas atque illas attendere inuiolabiliter et obseruare que in prelibati domini mei Babbenbergensis episcopi aliis litteris patentibus super hoc confectis que arbitrium ipsius episcopi promulgatum continent, sunt expresse. Ne igitur mee presentis renunciacionis series atque tenor per me aut per meos heredes, amicos atque homines tam presentes quam futuros in posterum mutari ualeat uel infringi, presentem paginam in euidens testimonium et in perhennem memoriam et in signum ratihabicionis heredum et amicorum et hominum meorum omnium tam presencium quam futurorum Werdensi ecclesie tradidi atque dedi meo pendenti sigillo atque domini mei reuerendi in Christo patris Bertoldi venerabilis episcopi Babbenbergensis et quorundam testium subscriptorum qui presentes fuerant, sigillis pendentibus roboratam. Datum et actum aput sanctum Leonhardum in domo parrochialis ecclesie, anno domini millesimo CC. LXXVIII., V. idus Februarii, testibus presentibus subnotatis, uidelicet dominus Johannes de Muchel canonicus Babbenbergensis et dominus Chunradus decanus ecclesie sancti Stephani Babbenbergensis et Chunradus et Wernhardus de curia prefati domini mei episcopi Babbenbergensis capellani et notarii, item dominus Arnoldus eciam canonicus Babbenbergensis, Fridericus, Otto, Chunradus, Ortlinus fratres de Weizenek, et Pertholdus de Vochenperge.

Source Fulltext: ZAHN, Codex Diplomaticus (=FRA II/31, Wien 1870) S. 381-382