Nos Conradus dei gracia Frisingensis ecclesie episcopus scire volumus universos presentium notitiam habituros, quod cum investi investigante sancti spiritus gratia et fervore divini amoris inflammante dilectus nobis Conradus notarius de Waidhoven zelo devotionis accensus basilicam sancti Johannis apostoli et evangeliste in parochiali ecclesia Waidhoven pro sua et aliorum omnium consanguinitate vel affinitate sibi coniunctarum animarum remedio propriis sumptibus erexisset hocque ipsius devotis precibus inclinati de gratia sibi concessimus speciali, ut eandem basilicam posset dotare de prediis seu de possessionibus per ipsum comparatis ad nostram collationem seu infeudationem spectantibus usque ad summam reddituum trium librarum, prout in litteris nostris super haec confectis plenius continetur. Hac itaque gratia sibi a nobis¹ obtenta idem Conradus dictam basilicam dotavit cum redditibus duodecim solidorum Wiennensium nummorum talibus condicionibus appositis et adiectis, videlicet quod inperpetuum omni septimana per plebanum et sacerdotes qui pro tempore fuerint, in ipsa basilica tres missae celebrentur quae sic per hebdomadam sunt divisae, videlicet omni quidem die Dominica in ortu diei² dicenda erit de sancta et individua trinitate alia (!) missa quae tunc convenit tempori et diei. Dicetur etiam in eadem missa una collecta de beata semper virgine Maria et una de sancto Johanne apostolo et evangelista et in fine illa collecta Omnipotens sempiterne deus qui vivorum dominaris et mortuorum etc. Item feria tercia dicenda est inperpetuum missa de apostolis cum collectis predictis vel missa de animabus, item omni die Sabbatho missa de sancta Maria cum collectis superius declaratis, nisi superveniens alia summa festivitas et solemnitas impediat. Ad haec praefatus Conradus statuit et ordinavit, quod census dictae basilica deserviens inter plebanum si residens fuerit, et sacerdotes aequaliter dividatur, si vero plebanus in loco parochiali non haberet residentiam personalem, tunc sacerdotibus qui ad huiusmodi missas celebrandas erunt obligati, predictus census in quolibet suo festo erit integraliter assignandus. Predia vero seu possessiones et tempora, unde et quando prelibatus census persolvendus erit, taliter distinguuntur, videlicet in festo beati Michaelis de beneficio in Ainsidl dabuntur tres solidi annuatim, in festo beati Johannis quod in Nativitate domini peragitur, de domo ipsius, Conradi in Waidhoven tres solidi erunt dandi, item in festo ipsius Johannis qui dicitur ante Portam Latinam, de decima in Fribresteten³ tres solidi et in festo sancti Johannis baptiste de vinea in Wagram tres solidi persolventur. Prenominata autem predia seu possessiones de quibus dictus census solvendus singulis annis erit, prelibatus Conradus cum⁴ consensu uxoris suae suorumque haeredum super aram sancti Johannis apostoli et evangeliste in prefata basilica constructam iure proprietatis libere tradidit et legavit, postmodum eadem predia et possessiones idem Conradus recepit a⁵ magistro Henrico Werdensi preposito tunc plebano in Waidhovn pro se et Chunegunde uxore sua et pueris eorum iure emphiteotico quod vulgariter burgkrecht dicitur, perpetuo possidendum, ita quod quandocunque ipse Conradus et Chunegundis uxor sua vel ipsorum pueri⁶vel quicunque eis successerint in ipsis prediis et possessionibus, prefatum censum non solverint in statutis diebus et terminis, tunc plebanus loci habebit potestatem se intromittendi in dictis prediis et possessionibus mediante iusticia et agendi de iisdem prediis et possessionibus quod dicte basilice videtur expedire. Si vero per negligentiam plebani vel sacerdotum quodcunque de statutis missis fuerit retardatum, tunc saepe dictus Conradus habebit potestatem retinendi tantum de dicto censu, quantum in dicendis missis fuerit pretermissum seu quicunque possessor predictorum prediorum seu possessionum fuerit, et id per eundem Chunradum vel alium prefata predia et possessiones possidentem omni die Dominico pauperibus qui tunc in hospitali fuerint, aliisque pauperibus erogetur. Ne igitur per nos vel nostros successores vel memoratum prepositum sepedicte ecclesie plebanum sive per alios in eadem ecclesia sibi canonice substituendos vel per dictum Conradum seu per suos haeredes tam praesentes quam futuros possit in posterum presens ordinatio in irritum revocari, presentem paginam in evidens testimonium et per omnem memoriam nostri pendentis sigilli munimine atque prelibatorum prepositi et Conradi sigillis pendentibus iussimus roborari. Datum et actum apud Waidhovn, anno domini MCCLXXVIIII., VI. kalendas Martii.

Source Fulltext: ZAHN, Codex Diplomaticus (=FRA II/31, Wien 1870) S. 385-387