Ich grave Albreht von Gverz vnd von Tirol, vogt von Aglei, von Trind vnd von Brihsen tvn allen den chvnt di disen brif sehent oder hoerent, daz ich vmb di vanchnvesse Arnoltes von Mvntalban als in min herre bischolf Emech von Vreising ze Lonke gevangen het, di vrvehe und si svne veber mich genomen han, also daz der bischolf von Vreising, sein levt und sein gvt vor Arnolden vnd vor sinen vrevnden und vor siner hovssvrowen vrevnden di mir zv hoerent und in miner gebiete sint, immer sicher sein vmb di schvlde und sol Arnold von seiner vrevnde sehse der erbaersten di in miner gebiete sint, des svern daz dev svne immer staete sei vmb di schvlde, und waere daz Arnolt von Mvntalban oder sin vrevnde di an windent von im selben oder von seiner hovssvrowen, di svne braechen gegen dem bischolf von Vreising oder gegen sines gotshovses levten oder gegen den di in sinem dinste waeren oder gegen sinem gute also daz sihtich waere, so waer Arnolt mit sampt den di mit im gesvorn habent meaineid und sint dannoch dar veber dem bischolf von Vreising und dem gotshovse ze Vreising schvldich fvemfhvndert march Agleiger. Dev vrvehe hat ein ende veber dev naehsten fvmf iar und daz gelvebd daz darveber getan ist, und als dev fvemf iar ende habent so sint di bvergen ledich vmb di vrveh, doch sol dev svne immer staet sein. Ditz ist geschehen da min brvder grave Minhart enantwrt was an miner stat, ze Geiselmannsdorf bei Laibach, nach Christes gebvrt veber tovsent iar vnd veber zvaihvudert iar an dem drei und ahzegistem iare, des Svnntages vor sanct Veitstage, des dreizehenden tages ingendes manen Junio.

Source Fulltext: ZAHN, Codex Diplomaticus (=FRA II/31, Wien 1870) S. 397-398