Nos permissione diuina Heinricus Werdensis, Hermannus Ardacensis ecclesiarum prepositi et Heinricus de Woluoltstorf et Bertholdus de Gebolspach milites et ministeriales ecclesie Frisingensis sub tenore presencium testimonium peribemus, nos vidisse pariter et audiuisse quod in nostra et illorum presencia quorum subscripta sunt nomina, videlicet dominorum Chunradi de Lok, Chunradi Gallonis, Chunradi et Offonis fratrum de Vansdorf militum et Gerlochi de Herttenberch, Heinrici dicti Watonis de Gekenpeunt, Alberti Judmanni, Friderici Hellonis, Vlrici Smazonis, Chunradi de Puetelpach, Alberti dicti Ardakerer et Vlrici dicti Schoenprunnarii Frisingensis curie domicellorum et Leonhardi et Jacobi fratrum de Gůtenberch Wernherus, Chůnradus, Nicolaus frates filii quondam domini Wernheri de Lok voluntate spontanea et sine coactione qualibet ad manus reuerendi in Christo patris domini nostri Emchonis venerabilis episcopi Frisingensis data fide sacramentum prestiterunt et sub eiusdem date fidei atque iuramenti prestacione firmiter promiserunt quod super ipsius domini nostri episcopi graciam parati essent pro dampnis, iniuribus (!) et excessibus per eos contra ipsius domini nostri episcopi predecessores et Frisingensem ecclesiam olim perpetratis, subire cuiuslibet satisfactionis et emende penam quam idem dominus noster episcopus Frisingensis contra illos decerneret promulgandum vel quam a memoratis Wernhero, Chunrado et Nicolao fratribus communicato suorum consulum consilio duxerit acceptandam, quandocunque a prelibato domino nostro episcopo super hoc iidem fratres fuerint requisiti. In cuius rei testimonium presentem paginam nostris et supradictorum testium videlicet domini Chunradi de Lok, domini Chunradi Gallonis et Gerlochi de Hertenberch et prefatorum fratrum videlicet Wernheri, Chunradi et Nicolai sigillis pendentibus iussimus communiri. Datum et actum in castro Lok, anno domini millesimo CC. LXXX. tercio, quarto idus Maii.

Source Fulltext: ZAHN, Codex Diplomaticus (=FRA II/31, Wien 1870) S. 396-397