Ich Alhait von Reinsperch tun chunt allen den die disen prief hoernt vnd sehent, daz der chriek der zwischen minen herren Emchen dem bischof von Frisingen vnt mir gewesen ist vmbe die hube vnt vmbe den man dacze Haberuelde, also geschaiden ist mit vnser baider gutem willen, daz ich gutlichen vnd zedurchslacht von der huebe dacze Haberuelde gestanden pin der ich iach von dem gotshause von Frisingen ze lehen, auf die genade daz mir min herre pischof Emche von Vrisingen die hube diu da haizet an dem Hirn, gelihen hat ze rehtem lehen vncz an minen tot, an waltgemerche vnd an zehenten vnd an marchfuter, vnd sol daz haben als andriv miniu lehen div ich han von dem selben gotshaus, vnuerchumbert, verchumbert auer ichz darueber, so si daz selbe gut dem gotshause von Frisingen ledich. Des sint gezivge graue Gerhart der probst von sant Andre, herre Friderich der prost (!) von Mosburch, graue Emche der probst von Wertse, maister Ruedger vnt herre Herwort die Chorherren von sant Andre, herre Otte der pharrer von Nivenhouen, herre Ekhart von Vihdorf, herre Chunrat von Vanstorf, herre Albreht der Proter, herre Arnolt der Piber, herre Otte von Zaelkingen, Otte vnd Albreht von Vihdorf, Weluinch von Randek, Richer Wolfstain. Diser prief ist gegeben dacz Waidhouen, nach Christes gebuert tausent iar, zwai hundert iar vnd in dem fuenf vnd ahzegisten iar, des Phinztages nach dem Ostertage.

Source Fulltext: ZAHN, Codex Diplomaticus (=FRA II/31, Wien 1870) S. 424