Nos Albertus comes Gorizie ac Tyrolis, Aquilegensis, Tridentine ac Brixinensis ecclesiarum aduocatus tenore presencium profitemur et constare uolumus vniuersis, quod cum reuerendis in Christo frater, amicus et consanguineus noster karissimus dominus Emcho venerabilis episcopus Frisingensis nobis proponeret et exponeret uarios defectus quos per iudices et officiales nostros in prediis et hominibus houmarchye Inticensis, videlicet pabulacionibus, pernoctacionibus, herbergis, uecturis, stiuris, angariis et perangariis et aliis quibuscunque indebitis exaccionibus ecclesiam Frisingensem et alias ecclesias eidem ecclesie attinentes conquerebatur nobis contra priuilegium inter pie memorie dominum Chunradum predicte ecclesie Frisingensis quondam episcopum et nos confectum indebite sustinuisse, nos, per predictum dominum nostrum Emchonem venerabilem episcopum Frisingensem super dampnis et iniuriis huiusmodi commoniti, recognoscentes eadem, secundum graciam ipsius domini nostri episcopi ad bonorum uirorum consilium satisfecimus de eisdem, relaxando uidelicet de viginti marcis que nomine aduocacie nobis debebantur secundum continenciam prioris priuilegii, annis singulis marcas decem, ita quod inposterum nos et heredes nostri annuatim in festo beati Martyny solummodo recipiemus marcas decem seu libras centum Veronensium paruulorum et nichilominus iniuriis et uexacionibus supradictis quas officiales nostri aut nostro nomine aut proprio motu seu eciam iuxta consuetudinem quam nobis post mortem domini Heinricy de Waelfsperch uendicauimus, predicte ecclesie intulerunt, cedimus et renunciamus pro nobis et heredibus nostris inperpetuum finaliter et precise. Preterea quia iudices nostri hominibus et prediis ecclesie memorate nimis graues uidebantur et infesti, nos ob amorem et specialis dileccionis amiciciam predicti domini nostri episcopi Frisingensis sibi suisque successoribus inperpetuum honus predictum alleuauimus in hunc modum, quod a Podyeprukke usque Apholterpach castellanus seu officialis uel alius cui dictus episcopus uices suas commiserit in hac parte, habebit cognoscere et iudicare de uniuersis et singulis causis et questionibus que mouebuntur et moueri possunt hominibus ecclesie Frisingensis uel ecclesiarum eidem ecelesie attinencium, exceptis casibus infrascriptis uidelicet de proprietatibus et feudis, de homicidiis, uulneribus illatis ferreis armamentis, oppressionibus uirginum et mulierum, latrociniis, furtis quibus secundum consuetudinem terre incurritur pena mortis, rapinis et incendiis, uiolenciis in quibus scilicet casibus iudex noster qui pro tempore fuerit, auctoritatem plenam habeat iudicandi, de omnibus vero aliis causis et questionibus castellanus seu officialis memorati domini nostri episcopi cui uices suas coramiserat, plenarie iudicabit sicut superius est expressum. Sane si aliquis hospitum uel extraneorum actionem seu querimoniam habuerit contra homines predicti domini episcopi, officialis seu castellanus ipsius habebit cognoscere ac iudicare in casibus ad dominum nostrum episcopum pertinentibus sicut superius continetur, si vero aliquis hospes uel extraneus contra nostros habuerit actionem aut nostri contra eum, super quacunque causa fuerit, ad nostrum iudicem pertinebit. Ceterum si inter predictum dominum nostrum episcopum et nos super bonis quondam nobiliuin de Waldekk aut aliis quibuscunque nunc est aut inposterum aliqua oriretur materia questionis, uel per formam iuris aut amicabilis composicionis decidatur. In cuius rei perhennem memoriam presentem paginam dedimus sigilli nostri pendentis munimine roboratam, testibus subnotatis qui sunt domini Fridericus magister milicie templi, Chunradus abbas de Weihensteuen, Heinricus decanus Frisingensis, Gerhardus, Fridericus, Chunradus, Emycho sancti Andree, Mosburgensis, Inticensis et Werdensis ecclesiarum prepositi, dominus Fridericus illustris comes de Ortemburch, Otto de Gesiez, Otto dictus Schalch, Chunradus de Vansdorf, Albertus dictus Proter milites, Gerlohus de Hertemberch, Chunradus de Haldemberch et alii quamplures. Actum et datum Inticine, anno domini M. CC. LXXX quinto, in festo sancti Luce ewangeliste, XIII. indiccionis.

Source Fulltext: ZAHN, Codex Diplomaticus (=FRA II/31, Wien 1870) S. 427-429