Wir Winther vnd Chvnrat brueder von Burchstal veriehen vnd tvn chvnt allen den die disen brief ansehent oder hoerent lesen, daz wir nach sogetaner vnzucht vnd wir vns vbersehen haben ze disen zeiten gen vnsers herren des ersamen bischof Emchen gnaden, sinen vrid vnd sin genade von dem naechsten Ostertag vber acht tag nach vnser lieben herren helf vnd rat gewunnen habn vnd behabt, also daz wir inner der vrist sin huld vnd sin genade vnd hern Chvnrats des burcgrauen vriuntschaft gewinnen suln vmb die vor genanten vnzucht, tu wir des nicht, so svln wir vns baide antwurten an gnade in sin burch oder in sinen tvrn als gevangen, des habn wir des ersten gesworn vnd setzzen im dannoch ze vbergewette dar zu daz im alles daz ledich si vnd sinem gotshaus daz wir von im habn ze lehn. Vnd dar vber ze einem vrchvnde wan wir aigens insigels nicht habn, gebn wir disen brief mit vnsers lieben vnd besvndern herren grauen Gerhartes des ersamen tumprobsts von Frisingen der daz nach vnser bet getan hat, insigel versigelten. Der brief ist gegebn ze Lok do von Christes geburt waren tausent iar, zwaihvndert iar vnd in dem fvnften vnd nivntzigistem iar, an dem heiligen Charvreitag.

Source Fulltext: ZAHN, Codex Diplomaticus (=FRA II/31, Wien 1870) S. 450