Ich Chvnrat der ivnge Aglaier burcgraf von Gortzach vergihe vnd tun chvnt allen den die disen brief an sehent oder hoerent lesen, daz Reimbrecht burger ze Lok der min vreierman waz, sich vnd siniv chint von mir geloset hat vmb acht march alter Aglaier pfenninge an daz gotshaus ze Frisingen da auch min herre der ersam bischof Emche des selben gotshauses sin gut vnd sin hilfe zu gegebn hat mit der beschaidenhait, daz Reimbrecht vnd siniv chint furbaz von mir vnd von minem vater vnd allen minen erben vrei vnd ledich sol sin an alle widerrede vnd verzeihe mich auf in aller der ansprache die ich nach im gehabt han oder von dehainen sachen noch gesuchen moechte, vnd verbinde auch mich dar zu daz ich mins herren des bischofs von Frisingen vnd sines gotshauses rechter gwer sol sin hinfvr des selben Reimbrechtes vnd siner chinde swa ich ez ze rehte tvn sol, vnd waer auch daz min vater her Chvnrat oder ander min erben dehain ansprache nach dem selben Reimbrechten oder nach sinen chinden suchten, des gib ich ze burgen hern Chunraden mines vetern svn burcgrauen ze Lok dem vorgenanten minem herren dem bischof, swelhen schaden er vnd sin gotshaus dar an naeme des sol er ir rehter gwer furbaz sin an miner stat, vnd gib ze einem vrchvnde vnd ewiger staetigvng dar vber disen brief mit minem vnd des selben hern Chvnrats insigeln versigelten, mit den geziugen die her nach stent, min herren graf Gerhart der tumprobst von Frisingen, graf Emche probst von Werdse vnd der edel herre graf Hauch von Montfort, Albrecht der richter vnd Dietrich der amman ze Lok vnd ander biderbe laeute, vnd ist der brief gegebn vnd diu taedinch geschehen ze Lok do von Christes geburt warn tausent iar, zwaihvndert iar vnd in dem fvnften vnd nivntzigistem iar, an sant Gregorien abent in der Vasten.

Source Fulltext: ZAHN, Codex Diplomaticus (=FRA II/31, Wien 1870) S. 449-450